Shillong, Risaw 02
U coach ka kynhun ïalehkai ka ri India, u Khalid Jamil u la ong ba ka jingthmu jong u ka long ban pynleit jingmut ïa ka AFC Asian Cup pyrshah ïa ka Singapore ka ban long ha ka 9 tarik mynta u bnai.
Da kaba sdang ïa ka jingkilanmet naduh ka sngi Saitjaiñ, u Jamil u la ong, “Ngi hap ban ïalehkai kum ka kynhun. Ngi hap ban pynkhreh bha bad ban ai ïa kaba bha tam,” ong u Jamil ha ka jingïalang bad ki nongthoh khubor ryngkat bad u coach ka kynhun ïalehkai U-23 jong ka ri u Naushad Moosa, lem bad ka ‘thei ïalehkai ka Crispin Chettri bad u coach jong ka kynhun ki ‘thei ïalehkai U-20 & U-17 u Alexander Joakim.
U coach u la ïathuh ba hapoh kane ka kynhun la kynthup lang ïa u Sunil Chhetri lem bad u rangïalehkai ‘dien u Sandesh Jhingan, uba la ïoh ka jingkoit na ka jingmynsaw na ki bynta jong ka ngab. “U Sunil u la lah ban ïalehkai bha ha u snem ba la dep. Kumta nga tharai ba kane ka dei ka por kaba biang ban ailad biang ïa u ban ïalehkai na ka bynta ka ri. Bad lada ki rangïalehkai U-23 ki long kiba tbit, thikna ba ngin sa jied ïa ki.”
U Moosa u la sngewkmen ban ïohi ba kane ka long ka jingkyrmen ba kum ka kynhun kan dang kiew shaphrang. “Kane ka kynhun ïalehkai (senior) ka don haduh khyndai ngut ki rangïalehkai U-23. Hynrei nga la ong ïa u Jamil ba un peit biang sa arngut ki rangïalehkai,” ong u Moosa.
“Ka dei ka por kaba sngewtynnad ba la khot ïa kiba bun ki nongïalehkai na ka bynta ka kynhun ïalehkai ‘senior’. Ki la pyni ïa ka rukom ïalehkai ha ka AFC U-23. Nga thikna ba kin sa wanrah ka jingkylla ynda ki la rung ha ka kynhun kaba kham shaneng. Nga sngewskhem ba ki don ïa kata ka jinglah,” la bynrap u Moosa.
