Jowai, Risaw 02
Ka jingpynkut ïa ka lehniam Durga Puja ha ka shnong Nartiang, West Jaiñtia Hills District ka jaka kaba la ñiew kyntang da ki riew ngeit Hindu kaba la tip kum ka Nartiang Shakti Peeth kala long kaba shongkun bad iphuh iphieng da ka jingwan ïashim bynta ki spah ngut ki riew ngeit na kylleng ka District bad kumjuh nabar ka Jylla.
Ïa kane ka lehniam Puja kaba pyndep da ki riew ngeit Pnar, ka sdang na Mandir ha kaba u Pandit u Oni Maskut Deshmukh u la rah marwei ïa ka blei Durga kaba la shna ha ka dur jong ka pashor kait naduh na Mandir shaduh wah Myntang ha jingsynran lang u Dolloi, ki pator, ki lyngdoh bad katto katne ngut ki riewngeit hindu lait noh ki kynthei.
Ha kane ka sngi la pyndep ruh ïa ka lehniam shad mastieh da u Dolloi ka Elaka Nartiang Salong Lamare ryngkat bad ki pator bad ki lyngdoh jong ka Elaka.
Hashwa ban pynngam um ïa ka blei Durga ka la don shwa ka jinglehniam harud katei ka wah kaba la kñia da u blang kynsai bad hadien katei la pyllait sa ïa ka paro.
Ka jinglehniam Puja ha Nartiang ka long kaba ïaid beit ïaid ryntih.
