Shillong, Risaw 02
Ki ar kol ba la thep da u Jefferson Nongphlang ki la biang pura ïa ka Nongthymmai ban pynliem noh ïa ka Lawsohtun da 2-0 kol ha ka lympung ïalehkai First Division Football League 2025 ba la pynïaid da ka Shillong Sports Association ha ka sngi Balang ha SSA Stadium kaba ha First Ground, Polo.
Utei u rangïalehkai shakhmat u la thep ha ka minit kaba 34 & 64 kata ha ka kylla step bad kylla miet na ka bynta ban pynlong ïa ka Nongthymmai ban khur ïa ki lai point ha kane ka jingïakhun kaba nyngkong jong ka aïom.
Kumba ka paw ka Nongthymmai ka dei ka kynhun kaba la shah pynhiar kyrdan na ka Shillong Premier League ha aïom ïalehkai 2024 hadien ba ka la wan ha ka kyrdan ba shatrai.
Ha katei ka jingïakhun u Jefferson u la ïoh ban pynkhih jar hadien ba u la ïoh ban shut ha kaba ka la leit dei na u dieng kol bad ka la rung hi jlang, katba ïa kawei u la ïoh ban thep tang na ka daw ka jingbakla pashat bol ki rangïalehkai ka Lawsohtun.
