Shillong, Risaw 02
Ka Non-Teaching Staff Association of North-Eastern Hill University (NEHUNSA) kala phah tuklar ha u Myntri ka Sorkar Pdeng ba khmih ïa ka Pule Puthi, u Dharmendra Pradhan halor ka jingpynslem ba khlem nongrim ha ka ban pynlong man ka por ïa ka jingïalang Executive Council jong ka University.
Ha ka shithi sha u Pradhan, ka NEHUNSA ka la ong ba ka Executive Council ka dei ka borkhmih kaba heh duh bad kaba pyniaid ïa ki kam jong ka University, bad ka jingïalang jong ka, ka long kaba donkam bha ha kaban pynbeit ïa ki mat pule puthi bad ki jingpyniaid kam, kynthup ka jingthungkam ïa ki nongtrei (non-teaching employees).
Ka ong ba ka jingpynslem ban pynlong ïa ka jingïalang kala pyndkoh ïa ka jingkiew ka University, namar ka jingbym lah ban pyntreikam ïa ki rai khlem ka jingmynjur jong ka Council.
Ka Association ka la pynrem ruh ïa u Vice Chancellor, Prof PS Shukla halor ka jingpynslem ban wan treikam ha Ophis, kaba la iaid mynta la jan shisnem.
Katkum ka NEHU Statutes, ka Pro Vice-Chancellor ba rangbah duh ka dei ban trei ïa ki kam jong u Vice Chancellor haba um don ne wan trei.
Ka NEHUNSA ka la kyntu ïa ka Pro Vice-Chancellor ba rangbah duh ba kan pyniaid ïa ka jingïalang jong ka Executive Council namar ka jingbym don u Prof Shukla. Ka Association ka la kdew ïa ka NEHU Statutes bad ka shithi na ka Ministry of Education, kaba ong ba baroh ki jingïalang ka University, kynthup ka Executive Council, dei ban pynlong hapoh ka Campus jong ka University. Ka la pynpaw ba u Prof Shukla um lah satia ban pynlong ïa kino-kino ki jingïalang kynthup ïa ka Executive Council namar ka jingjah trei jong u kaba dang iai bteng.
Ha kajuh ka por, ka NEHUNSA ka la pyntip ruh sha ki Nongïalam ba paw ka ri kynthup ïa u Rahul Gandhi, u ba dei u Nongïalam ka Liang Pyrshah ha Lok Sabha, Dr Ricky AJ Syngkon, MP ka Shillong Constituency bad Saleng A Sangma, MP ka Tura Constituency halor kane ka kam bad kyrpad ruh ïa ki ba kin tuklar lang.
