Shillong, Risaw 02
Ka lahduh jong u snem ba la la lah, ka Coco Gauff ka la lah ban pynliem noh ïa ka Eva Lys na ka bynta ban jam sha ka semi final ha ka sien kaba lai ha ka China Open.
Kane ka nongïalehkai kaba la bat ïa ka kyrdan ba lai ha ka pyrthei, ka la shimpor shi kynta bad 28 minit ban pynliem ïa katei ka nongïalehkai ka liang pyrshah da 6-3 6-4.
Katei ka nongïalehkai kaba na America, kaba la jop arsien ïa ka Grand Slam, ka la pynliem ïa ka Lys lai sien ha kaba sdang jong ka set.
“Nga sngewkmen ïa ka rukom ïalehkai ka jong nga – ka dei ka nongïalehkai pyrshah kaba khlaiñ, hynrei nga la pyrshang katba lah ban ïalehkai bha da ka jingshlur,” la ong ka Gauff.
“Nga sngew ban ong ba ngan dangïai bteng ha ka rukom ïalehkai jong nga namar ka long kaba kongsan. Ban ym ailad na ka bynta ban ïoh ïa ka jingjop ha kane ka jingïakhun.”
Katei ka ‘thei ïalehkai kaba dang 21 snem ka rta, kaba la shah rem noh ha kaba sdang jong ka Wimbledon hadien ba ka la jop ïa ka French Open dangshen mynta u snem, mynta ka la long ka nongïalehkai kaba la bat ïa ka kyrdan ba hakhlieh ha kane ka lympung.
Te kumta lyngba kane ka jingjop ka Coco Gauff kan pynkhreh ban ïakynduh final pyrshah ïa ka Amanda Anisimova lane ka Jasmine Paolini.
