Jowai, Risaw 02
Ka Khliehmyntang Ïalong bad Lumpyrtuh Mihmyntdu ki la long ki ar tylli ki kynhun kiba la rung sha ka semi final ha ka lympung ïalehkai 2nd Division Football Tournament na ka bynta ka 8th Debo Shullai Memorial Trophy ba la pynïaid da ka West Jaiñtia District Sports Association (WJDSA), hadien ba ki la khur jingjop ha ka sngi Palei.
Ha ka jingïakhun semi final kaba nyngkong kaba la long ha Kiang Nangbah Stadium kaba ha Jowai, ka Khliehmyntang Ïalong ka la pynliem noh ïa ka Giovento Mynso da 5-1 kol ha kaba u Bryan Pale bad u Bachan Pale ki la thep mar ar kol.
Ha kane ka jingïakhun baroh ar ki kynhun ki la pyrshang ban ïakhun tyngeh naduh kaba sdang, hynrei ha ka minit kaba 23 ka Khliehmyntang Ïalong ka la ïoh ban pynkhih jar nyngkong eh lyngba u Bryan. Haduh kaba kut jong ka kylla step ka Khliehmyntang Ïalong ka dangtam da shi kol na ka daw ba ka liang pyrshah kam shym la lah ban pynphai.
Hadien katto katne por ba la bteng ïa ka jingïakhun jong ka kylla miet, ka Khliehmyntang Ïalong ka la ïoh ban thep biang ïa ka kol kaba ar lyngba u Mebakynsai Pale (50). Kumjuh kane ka kynhun ka la thep biang sa ar kol lyngba u Bachan Pale (58 & 60) na ka bynta ban tam da 4-0 kol.
Hapdeng kane ka jingïakhun, u Bryan Pale u la thep biang sa shi kol ha ka minit kaba 79, hynrei hadien shi minit ka Giovento Mynso ka la lah ban pynphai kylla shi kol lyngba u Dolingstar Syntem hashwa ban kan mad ïa ka jingshah rem.
Haba phai sha kawei pat ka jingïalehkai kaba bud, ka Lumpyrtuh Mihmyntdu ka la pynrem ïa ka Dongmihsmgi lyngba ka tie-breaker da 5-3 kol hadien ba kine ki kynhun kim shym la lah ban thep kol haduh kaba kut ka jingïalehkai.
