Jowai, Risaw 02
Shibynta ka jingrakhe ïa ka Gandhi Jayanti bad kum ka jingpynkut ïa ka Swachhata Hi-Seva Campaign, ka Jowai Municipal Board ryngkat ka jingïatreilang bad ka Jaiñtia Tribal Traders Association (JTTA), Dorbar Shnong Tympang Iawmusiang bad Market Committee jong ka Seinraij Jowai, CNI bad Iawshyiap ki la pynlong ïa ka jingpynkhuid ïa ki jaka ïew jong ka sor Jowai ha ka 2 tarik Risaw.
Shwa ban ïashim bynta ha ka jingpynkhuid ïew, kala don ka jingïalang lyngkot ha kaba ka Additional Deputy Commissioner, West Jaiñtia Hills District bad CEO ka Jowai Municipal Board ka Kong DV Lyngdoh, MCS, kala pynpaw ïa ka jingdonkam jong ka jingkhuid jingsuba da kaba kyntu ïa baroh ban pyrshang ban pynneh pynsah ïa ka jingkhuid jingsuba ka sor Jowai, ki jaka ïew, jaka hat, bad ki sawdong sawkun.
Kala kyntu ruh ïa ki Market Committee ba kin pynthikna ba ki nongdie madan, ki nongshong dukan kim dei ban bret jaboh pathar, hynrei kin buh ïa ki jaboh jabain jong ki ha ka jaka lum ba la buh kyrpang.
U Doloi ka Elaka Jowai Ma Puramon Kynjing, u la ban jur ba ka jingpynneh pynsah ïa ka jingkhuid jingsuba ka dei ka jingkitkhlieh jong uwei pa uwei u nongshong shnong. U la kyrpad ïa ki samla pule ba kim dei ban bret pathar ïa ki song jingbam ha surok, bad pynshlur ruh ban long kiba don ka jingkitkhlieh bad long ka nuksa kaba bha ïa ka imlang sahlang.
Hadien ka jingïalang, ka Kong DV Lyndoh, CEO JMB ryngkat u Ma Philanderwel Lyngdoh, Chairman JMB, u Dolloi ka Elaka Jowai Ma Puramon Kynjing, ki nongshong shnong, ki trai dukan, ki nongdie madan bad ki nongtrei ka municipal ki la ïashim bynta ha kaba pynkhuid ïa ki surok, ka jinglum ïa ki plastic bad kiwei kiwei ki jaboh jabain.
Ïa kane ka juh ka sngi la rakhe ruh da ka Dorbar Shnong Loomkyrwiang da kaba pynlong ïa ka prokram ai jingpynshai bad ruh ka jingpynkhuid.
U Waheh Shnong Ma Lammat-O Laloo u la pyntip ba ka Dorbar Shnong ha ki khyndiat snem kala pyrshang ban pynlong ïa ka dong ka shnong kaba kup ïa ka dur jong ka jingkhuid jingsuba bad u pynpaw ruh ka jingsngew sarong ba ha une u snem lyngba Jowai Municipal Board la pynbna ïa ka Loomkyrwiang kum kawei na ki dong ki shnong bakhuid hapoh ka sor Jowai da kaba ïoh ruh ïa ka kyrdan kaba lai.
U khmih lynti ba lyngba jong kane ka sngi, ki nongshong shnong hapoh u pud u sam jong ka dorbar shnong kin kitkhia bad kiar na ka jingbret pathar ïa ki ñiut ki ñier bad ban ïatreilang bad ka Dorbar Shnong khnang ba ka burom kaba la ïoh yn nang pynjanai shuh-shuh kat nangïaid ki sngi ki por.
La ïoh ruh ka jingpule ïa ka Swachh Bharat Pledge bad pynbud sa ka jingpynkhuid pynsuba ïa ki lynti synkieng, ki umbam umdih bad umsait umkhlieng.
