Nongstoiñ, Risaw 02
Ka Sorkar Meghalaya lyngba ka tnat ka Koit ka Khiah, ka la ai ka jingmynjur (Administrative Approval) ban kyntiew kyrdan ïa ka Seiñduli Sub Centre sha ka Primary Health Centre (PHC) ha West Khasi Hills District.
Katkum ka shithi ba la phah da ka CM Khongwir, Deputy Secretary jong ka tnat ka Koit ka Khiah sha u Director of Health Services (MI), Meghalaya, la pynbna ïa ka jingmang tyngka ban shna ïa katei ka PHC kaba la kot haduh T.8,08,90,000 (phra klur, phra lak,khyndai phew hajar tyngka), kaba dei na ka bynta ka mang pisa jong u snem 2025-2026 bad kane ka kynthup ruh ïa ka quarter ne jaka sah jong ki nongtrei ha katei ka PHC.
Shuh-shuh la ong ba ka jingpyntrei ïa katei ka PHC kan ïaid ruh katkum ki kyndon ba la pruid dak lyngba ka ‘financial rules and procedures’ bad la khmih lynti ba ka jingkyntiew kyrdan ïa katei ka Sub Centre sha ka PHC kan long ka jingmyntoi bad kan pynkhlaiñ ruh ïa ka rukom ai jingshakri ïa ki paidbah ka thaiñ.
U Bah Methodius Dkhar, Myntri ka Sorkar Jylla bad MLA ka Mawshynrut haba pynpaw ïa ka jingsngewnguh halor katei ka projek u la ong, “Hadien bun-bun snem ka jingïai ap khmih lynti, mynta ka la wan urlong ha kaba la ai ruh ka burom bad jingïaroh ïa U Blei uba la plie lad ban pynurlong ïa kane ka projek.”
U la pynpaw ruh ka jingsngewnguh ïa u Myntri ka tnat ka Koit ka Khiah Bah Wailadmiki Shylla bad ïa baroh ki paidbah nongkyrshan bad ïa ka HSPDP da kaba ong ruh ba kane ka khubor ba bha kan ai jingkmenlang ïa baroh.
