Mawkyrwat, Risaw 02
Ka Khasi Students Union (KSU) South West Khasi Hills District ka la pynpaw ïa ka jingsngewkhia kaba jur halor ka jingshah ïehnoh khunswet ka Nongrim Warding Govt. LP School kaba hap hapoh ka Mawsynram C&RD Block namar ka jingbym don nonghikai shuh mynta la kumba saw bnai eiei naduh ka jingkhlad jong u nonghikai uba hikai ha kane ka skul.
U samla Evansroy Nongrem, Education Secretary ka KSU haba kren sha ki lad pathai khubor u la ong, ka seng ka la ïoh ïa ka jingujor na ki paidbah bad ïoh jingtip ruh na ki para dkhot shaphang katei ka skul bad la ïoh jingtip ba ka jingbym don nonghikai shuh ka dei naduh ka taïew ba nyngkong u bnai Jylliew, 2025 hadien ka jingkhlad noh jong u nonghikai, hynrei kaba sngewsih ka long ba haduh mynta ka Sorkar lyngba ka tnat ba dei khmih kam pat shym la phah thung bujli nonghikai ha katei skul.
Katkum ka jingïoh jingtip, la ïathuh ba ïa katei ka skul la seng ïa ka naduh u snem 1972 bad ka jingdon jong ki khynnah skul ka la poi sha ka 50 ngut tam bad ka jingdon ki khlieh briew ha katei ka shnong ka la kot sha ka 360 ngut eiei.
Na ka liang u Rangbah Shnong ha kaba ïadei bad katei ka jingeh u la dep ban ïakren ruh bad u MLA ka thaiñ ba un tuklar lem hynrei ka jingïakren kam shym la poi shaei-shaei.
Kumta ka KSU South West Khasi Hills District ka phah ïa ka kyrwoh sha ka Sorkar Jylla lyngba ka tnat Pule Puthi ba ka dei ban shimkhia noh mardor ïa kane ka kam bad ban phah nonghikai noh sha katei ka skul.
Ka seng ka la ai por ruh shi bnai ïa ka Sorkar bad lada jia ba kam lah ban leh eiei, ka seng ka la ong ba kam banse ban shimti hi noh dalade ban phah ïa ki samla pule kiba la nang la stad ban leit hikai ha katei ka skul khnang ba ki khynnah kin ym duh noh ïa ki jingpule bad ba kin lait na ka jingpep skul shiteng por.
