Shillong, Risaw 02
Hadien khatwei sngi jong ka jingshong ïakhih, ki nonghikai hapoh ka lama jong ka Federation of All School Teachers of Meghalaya (FASTOM) ha ka sngi Palei ki la rai ban weng noh ïa ka jingïakhih hadien ba na ka liang jong ka Sorkar ka la kular ban pyntreikam noh da ka rukom siew tulop kaba thymmai.
U Vice President ka Federation of All School Teachers of Meghalaya (FASTOM) u Bah Sanborn Jungai u la ïathuh ba na ka jingïakynduh ïa u Myntri Rangbah ka Jylla u Conrad Sangma ha ka sngi Balang, ka rai kaba la mih ka long ba ka Sorkar ka la rai ban ai ïa ki nonghikai Ad-hoc da ka Basic Pay, kaba long katkum ka jingtrei slem ki nonghikai.
U Bah Sanborn u la pyntip ba ki la rai ban weng noh ïa ka jingïakhih jong ki hadien ba u Myntri Rangbah ka Jylla u la kular ban pyntreikam noh da ka rukom siew tulop thymmai (New Pay Structure) ïa ki nonghikai Ad-hoc.
U Bah Sanborn u la ïathuh ba ha jingïalang bad u Myntri Rangbah, ki nongïalam ka FASTOM ki la pyni ïa ka jingeh ba ki nonghikai Ad-hoc ki ïakynduh da ki phew snem da kaba kdew ruh ba ki nonghikai Ad-hoc kin ym lah pyndap ïa ki jingdonkam lada ka jingsiew ba ki ïoh ka neh kumjuh bad khlem kiwei pat ki lad jingmyntoi.
U la ïathuh ba ha khmat u Myntri Rangbah, ki nongïalam ka FASTOM ki la pynsngew ba ka jingdawa ka dei beit ban kyntiew kyrdan ïa ki nonghikai Adhoc sha ka Deficit system ne Deficit Pattern.
“Ka Sorkar ka la ong ban ïa klet noh ïa ka jingdawa kyntiew kyrdan ïa ki nonghikai Ad-hoc sha ka Deficit system lane Deficit Pattern, namar kata la rai ban pyntreikam noh da ka ‘Basic Pay’ katkum ka jingslem ban trei ïa ka kam (Seniority) jong ki nonghikai,” la ong u Bah Sanborn.
U la ïathuh ba ki nonghikai kiba la hikai 10 snem kin ïoh tulop da kumwei, kiba la hikai palat 10 snem kin ïoh da kumwei bad kiba la hikai 30 snem kin ïoh la ka jong ka jingsiew. Nalor kata u la ong ruh ba kin ïoh ïa ka Dearness Allowances (DA) shisien shi snem khnang ba kan long ka jingïarap ïa ki nonghikai na ka jingkiew dor ki mar ki mata bad ruh kin ïoh ïa ka Central Provident Funds kaba long 8% na ka Sorkar bad 8% pat ban ïarap kynshew da ki nonghikai Ad-hoc ha ka CPF Account.
Shuh-shuh u la ïathuh ba ka Sorkar Jylla ka la rai ruh ban siew ïa ka Death-cum-Retirement Gratuity (DCRG) bad halor kane ki nonghikai kin sa shong jingïalang ban shim ïa ka rai katno ki nonghikai kin ïarap kynshew na ka bynta ka DCRG.
U la pyntip ruh ba kane ka jingïoh ïa ka tulop kan kynthup, naduh ki nonghikai Pre Primary, Lower Primary, Upper Primary, Secondary, Higher Secondary bad baroh kiba kynthup hapoh ki skul Ad-hoc, “Ki don kumba shi phew hajar ngut ki nonghikai ki ban ïoh ïa kane ka jingsiew haba shu kheiñ kyllum,” u la ong.
U la ong ruh ba namar ka Sorkar Jylla ka la rai ban pynhap ïa ki nonghikai Ad-hoc ha ka rukom siew tulop thymmai lane ka New Pay Structure, kumta ka Sorkar ka la pan por lai bnai ban bishar bniah bad ban pynkhreh ïa ka rukom siew tulop thymmai bad ka la kular ban pynbna ïa ka rai ha shuwa ka jinglehkmen Khrismas, kumta ki nonghikai ki la shim ïa ka rai ban weng noh ïa ka jingïakhih.
