Shillong, Risaw 03
U Diplo uba la ïoh khur haduh 3 sien ïa ka Khusnam Grammy Award, un wan ban pynshongshit ïa ki paidbah ha ka jingtem DJ ka jong u ha ka sngi ba-ar jong ka tamasa Cherry Blossom ka ban sa long ha ka 14 bad 15 tarik u Naiwieng 2025 ha JN Stadium, Madan Polo, Shillong.
U Diplo u dei u wei napdeng ki 10 ngut ki DJ kiba pawnam tam ha ka pyrthei bad la thikna ba ki jingtem bad ki sur kiba mih na ka jingtem DJ ka jong u kin pynkhih win ïa ki paidbah ban shad bad khih ka met ka phad ka jong ki.
Ha ka Sngi Nyngkong jong ka tamasa, yn pynbyrngia bad pynshongshit ïa ki paidbah da ki nongrwai ba pawnam ha ka pyrthei kiba kynthup ïa u Jason Derulo bad ka kynhun tem kaba la tip kum ka ‘The Script’ ha kaba yn synran lang ka Nora Fatehi kum ka nongshah khot kyrpang.
U Diplo mynshwa u la ïatreilang bad u khlur ka Bollywood u Shah Rukh Khan ha ka phlim ‘Jab Harry Met Sejal’ ha kaba u la pynmih ïa ki jingrwai bad paw ruh ha ka video na ka bynta ka jingrwai ‘Phurrr’.
Ki nongpynïaid ïa katei ka tamasa kin sa nang wanrah shuh ïa ki nongrwai bad kynhun tem ki ban pynbyrngia ha ka sngi ba-ar jong katei ka tamasa ïa kaba yn sa pynbna kham hadien. Ka Cherry Blossom Festival kan long ha ka 14 & 15 u Naiwieng ha JN Stadium & Polo Ground, Shillong bad ïa ki Tiket la lah ban ïoh mynta na ka bynta ka sngi ka ba-ar ne day 2 jong ka tamasa ha ka dor kaba long ha ka wat kaba nyngkong, da kaba leit ha ka RockskiTickets.com.
Ka Cherry Blossom Festival ka la nang pawnam ha u snem ba la dep ha kaba ka la jam shaphrang ban ïa kiwei pat ki tamasa bad Concert hapoh ka ri India kaba kynthup ïa ka Sunburn bad Martin Garrix’s India tour, da kaba ïoh khur 4 tylli ki Gold Awards ha Wow Asia, kynthup ïa ka khusnam ‘Festival of the Year’ bad ‘Entertainment Event of the Year’.
