Shillong, Risaw 03
U Samla Enlang Sawian, uba dei u nongsaid aiñ bad nongïalam ka HYC u la pynpaw ka jingsngewkmen ba ka National Commission for Schedule Tribe (NCST), Delhi ka la pyntip ha u ba ka la phah jingpyntip sha 2 ngut ki briew, kata sha u Secretary ka Electronics and Information Techno-logy (EIT) jong ka Sorkar India, bad u Superintendent of Police ka EKH ban pan ïa ka kaiphod na kine ki arngut ha kaba ïadei bad ka sienjam ba ki la shim ha kaba ïadei bad ka jingujor jong u bad ai por ïa u SP ban jubab ïa ka kaiphod hapoh 15 sngi.
U la ïathuh ruh ba na ka liang ka tnad Electronics and Informa-tion Technology ka Sorkar India ka la phah weng noh ïa kane ka ‘video’ ba pynmih ha ka ‘Channel’ jong u Raghav Sharma ïa kane ka jingkynnoh.
U la ong ba kane ka dei ka sienjam kaba sdang ba ki la jop ha ka jingujor pyrshah ïa kine kiba pynthoh bria ïa ka Jylla.
U Samla Enlang u la ong ruh ba un ïai buddien ïa kane ka kam bad un sa pan RTI na ka National Commission for Schedule Tribe ban tip kaei ka sienjam ba ka la leh na ka bynta kane.
U Samla Enlang Sawian u la ïathuh ba kane ka dei ka jingujor pyrshah ïa u Pandit, u Sushil Guru bad ïa u nongpyndonkam ‘YouTube’, u Raghav Sharma ha kaba u Sushil Guru uba kam ïalade kum u Pandit u la kren khlem da wad bniah bad pynthohbria ïa ka jylla Meghalya bad ka jaidbynriew da kaba kynnoh ïa ka Jylla kum ka Jylla ba kñia briew ne bamdoh briew.
