Shillong, Risaw 03
Ka Meghalaya SSA School Association ka la rai ban pynlong da ka jingïalang ban ïakren halor ki mat jingdawa haba ïadei bad ka Polisi ban pynskhem ïa ka kam jong ki nonghikai SSA, ka rukom siew tulop ne ka Pay Scale Structure bad halor ka Teachers Eligibility Test (TET)
U Bah Aristotle C Rymbai President ka Meghalaya SSA School Association u la pyntip ba ha ka 06 tarik Risaw 2025 kan don ka jingïalang jong ki nonghikai SSA ha madan Malki naduh ka por 11 baje mynstep.
U la pyntip ruh ba ha katei ka jingïalang yn ïakren ïa ki kam ba ka seng ka la ïai dawa bad ïai buddien bad ka Sorkar Jylla ban pyntreikam noh ïa ka jingthungkam ba pura ïa ki nonghikai SSA, kumjuh ruh ban pyntreikam noh ïa ka rukom siew tulop (pay structure) ha ryngkat ka jingpynkiew ka tulop ïa ki nonghikai SSA.
Nalor kata yn ïakren ruh ïa ka hukum ba dang shen jong ka Supreme Court, kaba ong, “Baroh ki nonghikai ki dei ban pyndep ïa ka Teachers Eligibility Test (TET), watla ka jingtrei jong ki ka la palat ïa ka 10 haduh 15 snem ki donkam ban pyndep ïa kane, lait noh ki ba la jan shongthait.”
Kumta na ka liang ka Association ka kyrpad ïa ki nonghikai SSA baroh ba kin ïa wan sha katei ka jingïalang.
Lah ban kdew hangne na ki 5,131 tylli ki skul SSA ha Meghalaya, palat 3,332 tylli ki skul ki la ai No Objection Certificate ban aiti pynïaid sha ka Sorkar Jylla bad na kine 3,034 tylli kidei ki skul ba la pyniaid da ki shnong bad ki don 298 tylli ki skul ba la pynïaid da ki kynhun niam bapher-bapher bad ki riewshimet.
