Shillong, Jowai 03
Ka Zemabawk YMCA na Mizoram ka la khur ïa ka namjop da kaba jop ïa ka Laitlyngkot YMCA na Meghalaya da 4-3 kol ha ka jingïakhun phainal ba shongshit bha jong ka 2nd North East Region YMCA Futsal Tournament 2025.
Kane ka lympung ïalehkai la pynïaid da ka Jowai City YMCA bad la pynlong ïa ka ha ka 01 tarik bad 02 tarik Risaw 2025 ha ka Chalton Jowai Arina, Moosalengkat, Jowai, Meghalaya.
Ha ka sngi ba sdang ïa ka jingïalehkai, u Ma Khroobok Passah, District Sport Office West Jaiñtia Hills District u la long kum u kongsan.
U Ma Khroobok ha ka jingkren jong u kum u kongsan, u la pynpaw ka jingsngew tynnad ïa ka YMCA halor ka jingïai trei shitom jong ka na ka bynta ka roi ka par jong ki samla. U la ong ruh ba, “Ka jingïalehkai ka long kawei na ki lad ba ngi lah ban long ki ba koit ba khiah, bad kum kane ka tournament ka ai ruh ka lad ban ïoh ïakynduh lang bad ki wei pat ki paralok kiba na bar ka jylla.” U la pynpaw ruh ïa ka jing-sngewtynnad ban pdiang sngewbha ïa ki kynhun ba wan na bar, bad u la pynsngew ruh ïa ka jingieit ba khraw ki nong Jowai ïa ka phutbol.
Ïa ka jingïalang plie la pynïaid da u Tbn. John Shullai, President, Jowai City YMCA. La ïoh ruh ïa ki jingkren lyngkot na u Joe RZ Thanga, National Representative/General Secretary, Aizawl YMCA, na u Rev. G S Shulla, General Secretary, Jowai City YMCA, Bah Sandi Tariang Rigional Vice President YMCA, bad na u Bah Shamir J Thabah, Region Secretary YMCA.
U Bah Shamir Thabah kum u regional Secretary u la kren da ka jingsngewkhia bad ka jingsngew ieit halor ka thong jong ka YMCA ban kyntiew bad ai mynsem ïa ki samla ha kino-kino ki liang bad u la pynkynmaw ruh ïa ka bynta ba ka seng ka la shim ban sdang ïa ki jingïalehkai kum ka volleyball, basketball, coco ball, racket ball bad futsal. “Ngi ha ka YMCA ngi pyrshang katba lah ban peit ba ki samla kin ym shah ktah ha ki jait jingpynleit jingmut kiba lah ban pynjulor ïa ka imlang sahlang bad ka roi ka par jong ki, u Bah Thabah, u khot u wer ïa ki samla ban long ki nongpynkylla ïa ka imlang sahlang sha ka lynti ba bha.
Ha une u snem, la wan ïashim bynta da ki 8 tylli ki YMCA team na kylleng ka thaiñ, kiba kynthup ïa ka kynhun na Jylla Aizawl YMCA, Nongtalang YMCA Team A & Team B, Zemabawk YMCA,Laitlyngkot YMCA, Jowai City YMCA Team A & Team B bad Shangpung YMCA.
Na kine ki 8 tylli ki team, ka Zemabawk bad ka Laitlyngkot ki la poi sha ka phainal. Ka jingïakhun phainal ka long kaba itynnad bad ïakhait bha naduh basdang, namar ki la lah ban ïa sum markylliang. Hynrei, dei ha ka kylla miet ba ka Zemabawk Mizoram ka la ïoh ban pyntam shi kol bad pynskhem ïa ka jingjop da ka score 4-3, kaba la pynlong ïa ki ban long ki lahduh jong une u snem.
ïa ki khusnam sha ki nongjop la sam da u Bah Jeo RZ Tanga National Representative jong ka YMCA, Bah Sandi Tariang Regional Vice President YMCA, bad u Bah Shamir J Thabah Regional Secretary YMCA. Nalor ki khusnam ba la ai sha ki ar tylli ki kynhun ba poi phainal, la sam ruh ïa ki khusnam shimet kum ka Best Debut Team kaba leit sha ka Aizawl Team bad ka Best Futsal Team sha ka Laitlyngkot Team. Nangta u Player of the Tournament la ïohrah da u Lalram Sanga jong ka Zemabawk Mizoram.
Hadien ka jingsam ïa ki khusnam, la ïoh ïa ki kyntien ai khublei bad jingduwai na u Rev. K Khonglah, kum ban pynkut ïa ka lympung ïalehkai.
