Shillong, Risaw 03
Ka Bright Future SSCC, Young SSCC bad Diengshynrum SC ki la jop ha ki jingïalehkai jong ki jong ka lympung Meghalaya Women’s State League 2025, kaba la long ha ka 02 tarik Risaw 2025 bad jia ryngkhat baroh lai tylli ki jingïalehkai ki la jop da 2-0 kol.
Ha ka Group B ha madan Mawlum Tyrsad, ka Bright Future SSCC (jong ka Pyndengumiong District Sports Association) ka la pynliem ïa ka Mawten SC (jong ka Mawkyrwat District Sports Association) shwa ba ka Young SSCC (jong ka PDSA) kan pynliem noh ïa ka Mawsawrit SC (jong ka Tyrsad Area Sports Association).
Ha ka Group C, ka Diengshynrum (ka East Jaiñtia Hills District Football Association) ka la pynliem ïa ka Chirupheiwi Nongkynrih FC (jong ka Laskein Block Sports Association) ha Laskein.
Ki nongthep kol ki long na ka bynta ka Bright Future ka Banrisha Kyrsain (20′) bad ka Lavina War (68′), ka R Syiemlieh (9′) bad J Ryntathiang (11′) jong ka Young SSCC bad ka Charlinda Nongtdu (70′, 80′) na ka bynta ka Diengshynrum.
Ka jinglong jingman ha Tyrsad ka long kaba eh bha bad u slap uba jur bad ka jingkah lyoh ka la don ruh ha katei ka sngi. Hynrei watla katta ki nongïalehkai ki la pyni ïa ka jinglong shlur bad ka jingkut jingmut kaba khraw ban ym ailad ba kata kan khanglad ïa ki katba ki dang wad ban jop na ka bynta la ki jong ki jong ki klob.
Ka Tyrsad Area Sports Association ka la kyrshan slem bha ha ka jingïalehkai phutbol jong ki kynthei, ha kaba ka dei kawei na ki synjuk district ba nyngkong eh ban pynlong man ka por ïa ki lympung ïalehkai phutbol jong ki kynthei. Bun na ki nongïalehkai kiba la mihkhmat ïa ka jylla ne kiba la leit ban ïalehkai ha ki klob ha kylleng ka ri kidei kiba la don bynta teng ha ka jingïalehkai phutbol jong ki ha ka TASA league.
Ki jingïalehkai ban long ha ka 04 Risaw 2025 ki long:
Group A – Na Rympei Football Academy pyrshah ïa ka Pay For Right Football Academy, 10 baje mynstep, ha madan SSA Stadium Shillong
Group B – Young SSCC pyrshah ïa ka Mawten SC, 12 baje shiteng sngi, ha madan Mawlum Tyrsad
Group B – Mawsawrit SC pyrshah ïa ka Mawlum Tyrsad SC, 2:30 nohphai sngi, ha madan Mawlum Tyrsad
Group C – ym pat don jingpynbeit.
