Kino kino ki jait jingïakhih ki pynjot bad ki ktah ïa ka kamai kajih bad ka die ka thied jong u paidbah. Ki jingïakhih sangeh kamai ki kali ka ktah ïa ka leit ka wan bad ka kit ka bah ïa ki mar ki mata u paidbah. Ki jingïakhih ki nongiew ruh ka ktah ïa ka die ka thied ki mar ki mata ha ïew ha hat. Ka jingïakhih ki nongtrei ka koit ka khiah ruh ka ktah ïa ka rukom ai jingsumar ïa kiba pang ba shitom uba bun. Ka jingïakhih pynkiew bainong ki nongbylla ruh ka ktah ïa ka ioh ka kot kiba rit ba ria bad ïa kiba duk ba im kamai mynsngi bad bam mynmiet.
Ka jingïakhih ki nonghikai skul ruh ka ktah ïa ka pule ka puthi ki khynnah skul ha ka jylla baroh kawei. Kino kino ki jingïakhih ki long nongshun jong u paidbah hapoh ka ri. Ki paidbah kiba im kamai/bylla man ka sngi ban ioh pyndap ïa ki jingdonkam ba man ka sngi ki shem jingeh haba don bun ki jingïakhih ha ka Jylla. Ki nongpynlong jingïakhih ki dei ban da pyrkhat bha shuwa ba kin pynlong ïa kino kino ki jingïakhih namar ka ktien salonsar ïa ka ioh ka kot ka kamai kajih jong ki briew khamtam kiba duk. Kane ka long ka jingmih jong ka jingïakhih haba sangeh treikam da kino kino ki kynhun ruh.
C. B. Iawphniaw
