Shillong, Risaw 03
Hadien ba ka Sorkar Jylla lyngba ka tnad ka koit ka khiah ka la pynmih ïa ka jingmang ne ka jingbhah (state quota), na ka bynta ki samla pule ka Jylla kiba thmu ban pule ïa ka MBBS, BAMS bad BHMS, ka Khasi Students’ Union (KSU), ka la lap ba ka don ka jing kynrum kynram ne ka jingbakla.
Haba kren sha ki lad pathai khubor ha ka 03 tarik u Risaw 2025, u Bah Donald Thabah, General Secretary u la ong ba ka Sorkar Jylla ka la dkoh bad bakla halor ka Reservation Policy.
U Bah Donald Thabah, u la ong ba la lap ba ha ka Open Category, la don 14 ngut kiba la shah jied lyngba ka bhah jong ka Sorkar, hynrei la shem pat ba ki trai Jylla kiba ïoh heh mark ki poi pynban sha ka ‘waiting list’, katba kiba wan ha ka list ki dei ki bar jylla, kumta kane ka long ka bym lah ban pdiang.
“Watla ka Sorkar Jylla ka la pynsangeh shwa mynta hynrei kaba donkam ka dei ban pynbeit noh mardor ïa kane ka jingkynrum kynram,” u la ong.
U la ong ruh ba i samla Khasi iba ïoh kham bun mark ban ïa arngut kiwei pat ki samla kynthei bar jylla, im shym la ïoh rung ha ka Open Category.
“Ha ka jingshisha, katkum ka quota system ba pynïaid ka Jylla, lada ki Khasi ki ïoh heh mark kin rung hapoh ka Open Category, namar ka Open Category ka long ‘unreserved’ bad kam dei kaba la mang tang na ka bynta ki bar jylla, hynrei mano-mano ruh kiba dei na ka Jylla, ki lah ban ïoh rung hapoh ka Open Category,” la ong u Bah Donald.
U la ïathuh ruh ba i nongïakhun ba nyngkong duh jong ka Khasi-Jaiñtia Category i ïoh haduh 475 NEET Score bad i tam ruh ïa ka Diya Ghosh, kumta i dei ban rung ha ka nombar 13 ha ka Open Category bad ka Diya kadei ban hiar ha ka nombar 14, da kaba ong ba kawei ka bar jylla ba kyrteng ka Tanuska Chakravorty kam dei ban don wat tang ha ka waiting list ruh namar ka ïoh 442 ka NEET Score. “Lada ngi peit ïa ki Khasi naduh nombar wei haduh nombar hynñiew, ki ïoh heh ka NEET Score, da kaba ong ba kitei ki 3 ngut ki bar jylla kiba kynthup arngut ha ka Open Category bad i wei ha ka waiting list, kim don hok ban don ha ka list”.
Kumta u Bah Donald u la ong ba kane ka dei ka jingbakla ha ka MBBS ba ka Sorkar ka leh, ne ïoh lehse ka Sorkar ka leh khnang ruh tang ban pynhun ïano-ïano, hynrei ka KSU hi kan nym ailad ba kane kan pynduh lad pat de ïa kiwei ki paradoh parasnam kiba don hok ban ïoh rung ban leit pule ha ka MBBS, la ka dei ha ka Open Category lane ha ka Khasi-Jaiñtia Category.
U Bah Donald u la ong ruh ba ha ka Bachelor Ayurvedic Medicine and Surgery, la lap ba ha ka Open Category, la ïoh da u bar jylla, hynrei haba peit pat ha ka waiting list, ki la don sa arngut kiwei pat ki bar jylla, ha kaba ha ka waiting list, la dei ban ïoh da arngut ki Khasi kiba don ha Khasi and Jaiñtia Category kiba kham heh mark ban ïa ki arngut ki bar jylla kiba don ha ka Open Category waiting list.
“Ka seng ka la ïoh jingtip ruh ba ka don ka Schedule Caste Category ha ka Reservation Policy, nalor ka jingbuh ruh ïa ka Standard Operating Procedure (SOP) na bynta ki samla ha shwa ba kin ïakhun ïa ka eksamin,” la ong u Bah Donald. Nalor kata, u la ong ruh ba ha artylli ki jingpule kiba ïadei bad katei ka laiñ, ka don ka category SC ka bym pat ju don mynno-mynno ruh, ha kaba u la dawa na ka Sorkar ba ka dei ban weng noh mardor. “Ka Sorkar Jylla ka la pynmih ruh ïa ka SOP kaba ki samla kin hap ban pyndap shwa ban thoh eksamin kaba pyni ba ka Sorkar ka ïaleh ban thep beit tang ïa ki bar jylla,’ u la bynrap.
