New Delhi, Risaw 03
Ka “Swasth Nari Sashakt Parivar Abhiyaan” (SNSPA), kaba la sdang naduh ka 17 tarik u Nailur, 2025 haduh ka 2 tarik u Risaw, 2025, ka la kut noh da ka jingïashim bynta jong kiba bun ha kylleng ka ri India, kaba ai jingmyntoi ïa ki lak ngut ki longkmie, ki khynnah, bad ki longïing lyngba ki jingshakri ba pura ha ka koit ka khiah.
Haduh kaba kut jong ka 02 tarik u Risaw, 2025, palat 18 lak (18,08,071) tylli ki ‘Health Camp’ (kiba kynthup ïa ka jingpeit bniah bad ki ‘Camp’ ba kyrpang) la pynlong hapoh ka ‘Abhiyaan’, kaba la don ïa ka jingpynrung kyrteng ki nongshong shnong haduh 9,85,63,619 klur ngut ha baroh kawei ka ri bad kaba la ai jingmyntoi ïa palat 6.5 klur ngut ki longkmie.
Ki jngjop ba kongsan jong ka ‘Abhiyaan’ ki kynthup ïa ka jingpeit bniah ïa ka jingpang ‘hypertension’ bad jingpang shini ha kaba la peit bniah ïa palat 1.78 klur ngut ki nongshong shnong na ka bynta ka jingpang ‘hypertension’ bad 1.72 klur ngut na ka bynta ka jingpang shini.
Ha kajuh ka por, la peit bniah ïa palat 37 lak ngut ki longkmie na ka bynta ka jingpang ‘Breast Cancer’, bad palat 19 lak ngut na ka bynta ka jingpang ‘Cervical Cancer’. Ka jingpeit bniah ïa ka jingpang ‘Oral Cancer’ pat ka long palat ïa 69 lak ngut ki briew.
Haba phai sha ka koit ka khiah jong ki kmie bad ki khun, la pynlong palat 62.60 lak tylli ki jingpeit bniah ïa ka koit ka khiah hashuwa ban kha khun, katba palat 1.43 klur ngut ki khynnah ki la ïoh ïa ki tika ai jingïada.
Kumjuh, haba ka liang ka jingduna snam bad ka bam kaba tei, la peit bniah ïa palat 1.51 klur ngut na ka bynta ka jingduna snam. Ki jingïalang ai jingïasyllok shaphang ka bam kaba tei ki la poi sha palat 1.16 klur ngut ki briew.
Nalor kine, palat 85 lak ngut ki nongshong shnong ki la shah peit bniah na ka bynta ka jingpang TB bad 10.23 lak ngut na ka bynta ka jingpang ‘Sickle Cell’ bad 10.69 lak ki ‘Ni-kshay Mitra’ kiba la pynrung kyrteng.
Shuh-shuh palat 4.30 lak ngut ki nongai snam ki la pynrung kyrteng ïalade, bad la pyllait ruh ïa palat 10.69 lak tylli ki ‘Ayushman/PM-JAY Card’.
Ka ‘Swasth Nari Sashakt Parivar Abhiyaan’ ka dei ka jingïarap kaba heh tam haduh mynta na ka bynta ki longkmie bad ki khynnah ha India. Kane ka sienjam, kaba la lamkhmat da ka tnad ka koit ka khiah bad ka tnad Women & Child Development (MoWCD), ka kynthup ïa ka jingpynlong da ki lak tylli ki ‘Health Camp’, naduh ka 17 tarik u Nailur haduh ka 02 tarik u Risaw ha ki ‘Ayushman Arogya Mandir’, ki Community Health Centre (CHC), ki Hospital ha ki distrik, bad kiwei-kiwei ki jaka ai jingsumar jong ka Sorkar ha kylleng ka ri ban ai ïa ki jingshakri na ka bynta ha ka koit ka khiah ka jingïada, ka jingkyntiew bad ka jingsumar na ka bynta ki longkmie ha ka imlang-sahlang.
