Shillong, Risaw 03
Ka jingthmu u President ka Indian National Congress (INC), u Mallikarjun Kharge ban wan jngoh ïa ka Jylla mynta u bnai la pynkynriah noh shuwa namar ka jinglong-jingman haba ïadei bad ka koit ka khiah.
Katkum ka jingong u President ka Meghalaya Pradesh Congress Committee (MPCC), u Bah Vincent H. Pala u la ong ba ïa kane ka jingwan jngoh ym shym la pynsangeh, hynrei la pynbeit biang ha kawei pat ka por, ha kaba ïa ka tarik thymmai ym pat lah ban pynbna.
U Kharge, 83 snem ka rta, dang shen u la shah sumar bad u la pynpaw ïa ka jingsngewnguh jong u sha la ki nongkyrshan ha ka rynsan lad pathai.
“Ka jingkhublei kaba khraw sha ki dkhot, nongïalam, bad ki nongkyrshan jong ka Congress na ka bynta ka jingtuid jong ki jingkitbok kitrwiang jong ki. Ka jingkhublei kaba khraw tam jong nga. Nga thmu ban sdang noh shen ïa ka jingtreikam jong nga,” u la thoh ha ka rynsan lad pathai ‘X’.
Kumban shu kdew hangne, ka jingwan jngoh u Kharge ka long kum shi bynta jong ki jingpyrshang ka seng ban pynkhie im biang ïalade ha kane ka Jylla ‘riewlum ha kaba kane ka seng heh ka ri ïa mynta kam don nongmihkhmat shuh hapoh Ïingdorbar Thawaiñ ka Jylla – kaba dei ruh ka sien ka banyngkong eh ba ka seng kan mad ïa kane naduh u snem 1972.
Ka State Congress Unit ïa mynta ka dang don hapdeng ka jingpynbeit thymmai ïa ka rukom treikam, ha kaba ki jingïakren ki dang ïaid ha Delhi ban saiñdur ïa ka lynti ïaid na bynta ka lawei jong ka.
Ka seng ka ju don ha ka Liang Pyrshah ne Liang Synshar hapoh ka Jylla ha kine ki sanphew snem ba la leit bad ka kam ju duh ban shah jied ïa ki MLA ki ban mihkhmat hapoh ka Ïingdorbar Thawaiñ ka Jylla.
Hynrei ka jingnang hiar jong ka Congress ha ka Jylla ha kane ka kynti ka long kaba kyndit haduh katta-katta, naba ki lai ngut ki MLA jong ka – u Dr. Celestine Lyngdoh, u Bah Gabriel Wahlang, bad Bah Charles Marngar – ki la leit pynïasoh noh sha ka National People’s Party (NPP) ha u Nailar, 2024, kaba la pynlong ïa ka seng ban sah noh tang bad uwei u nongthaw aiñ ha ka Ïingdorbar kaba don 60 ngut ki dkhot.
Hynrei kaba sngewlyngngoh ka long ba wat une u MLA ba marwei ka Congress ruh, u Bah Ronnie V. Lyngdoh, u la leit pynïasoh noh sha ka NPP (ka seng kaba synshar) ha u bnai Naitung mynta u snem, kaba la pynlong ïa ka seng ban duh lut ïa baroh ki nongmihkhmat jong ka ha ka Ïingdorbar ha ka sien ka banyngkong eh naduh ba ka Meghalaya ka la ïoh ïa ka Jylla lajong ha u snem 1972.
