Shillong, Risaw 03
Kawei ka kali ka la julor jur hadien ba ki maw kiba heh ki la hap najrong lum, hajan ka shnong Pomlum, ka surok Shillong-Pynursla-Dawki, ka jaka ba dang ïaid ka jingshna pynheh ïa ka surok.
Ha kane ka jingjia shah lynshop ha ki maw ha ka surok Shillong-Pynursla-Dawki, ki briew kiba don hapoh kali (passenger ), ki la lait salit khlem kano-kano jingjia mynsaw.
Kane ka jingjia shah lynshop ha ki maw ïa katei ka kali kadei kaba la jia ha janmiet jong ka sngi Palei, ka 02 tarik u Risaw 2025.
Katkum ki tyllong khubor ba la ïoh lum la ïathuh ba katei ka kali ka dang ïaid lyngba kane ka surok, wat haba la maham ba bymbit ban ïaid, namar ka jingdon ki maw kiba shong synjor kiba ïai bteng ban hap nalor u lum bad ha ka por ba katei ka kali ka dang ïaid don ki maw ba shong synjor, ki la hap bad dei beit-beit ïa katei ka kali kaba la wanrah ïa ka jingjulor.
Hynrei jia ryngkhat ba ki briew kiba don hapoh ka kali ki la ïoh ban mih kloi napoh ka kali ha ka por kaba biang, ha kaba ki la shu lait salit na ka jingjia ba sngewsih.
Kum ban shu kdew, ka SDO jong ka Pynursla ka la dep ban pynmih ïa ka jingpyntip paidbah ha kine ki sngi ba la leit ban pyntip ïa ka jingpyrkhing ïa ka jingïaid ki kali hapdeng Laitlyngkot bad Lyngkyrdem, na ka bynta ka jingshngaiñ namar ka jingther u slap bad ka jingshong synjor ka khyndew ha kane ka thaiñ.
Na ka liang ki bor ba dei peit ki la maham ba kane ka bynta jong ka surok ka don jingma ha ka por slap, katba ym pat dep ban pynbha ïa ka.
