Shillong, Risaw 03
Ka FIFA ka la pynpaw bad pyni ïa ka bol ïalehkai ba thikna na ka bynta ka lympung World Cup 2026, kaba pynïasoh lang ïa ki jingpynbha ba stad bad ki jingpynwandur ba bniah ban pynkmen ïa ki lai tylli ki ri kiba ïadon bynta lang ha ka jingpdiang sngewbha ïa ki jingïalehkai – ka United States of America, ka Mexico bad ka Canada. ïa kane ka bol, kaba la khot Trionda, la shna biang da ka kompeni shna bol na Germany, ka Adidas, kaba ai ïa ki bol ba thikna jong ka World Cup, naduh ka jingïalehkai jong u snem 1970. “Nga dap da ka jingkmen bad sngewsarong ban aiti ïa ka Trionda”, la ong u president ka FIFA, u Gianni Infantino kumba la pynpaw ïa ka bol ha ka jingïalang ha New York ha ka sngi Palei jong ka taïew.
Kane ka World Cup kadei kaba nyngkong eh ka ban pynlong da ki lai tylli ki ri, ha kaba ki don 48 tylli ki kynhun kiba ïakhun, ka la ai mynsiem ïa ka kyrteng bad ka jingshna ïa ka bol kaba don ïa ki rong saw, rong blue bad rong jyrngam.
Ki dur na kawei pa kawei ka ri nongpdiang — ki sla dieng maple na Canada, u Khlieng (eagle) na Mexico bad ki khlur na America ruh ki paw, ryngkat bad ka dur kaba lai dong kaba thew ïa ka jingïatylli jong ki lai tylli ki ri.
