Tura, Risaw 03
Ki Nokma na ki ‘A’king’ bapher-bapher kiba hap ha Chokpot, South Garo Hills ki la pyrshah ïa ka sienjam ba dang ïaid jong ka Sorkar Jylla ban lum jingtip ha ki jaka jong ki lyngba ki ‘Survey’ hapoh ka Panchayat Advancement Index (PAI), da kaba pynpaw ba kane ka rukom synshar kam treikam ha ki jaka ba hap hapoh ka Khyrnit ba 6, ha kaba ki don ki District Council.
Ka jingpyrshah ïa kane ka sienjam jong ka Sorkar ka la jia ha ka jingïalang ba kyrkieh kaba la pynlong ha Nokma Bandasal ha Chokpot ha kaba ki Nokma bapher-bapher jong katei ka thaiñ ki la ïa poi lang.
“Ngi ka Nokma Council jong ka Chokpot Unit ngi ngeit skhem bad kren shai ba ka rukom treikam ka Panchayati Raj kam don kano-kano ka bor aiñ ne Riti Synshar ha ki jaka ba hap hapoh ka Khyrnit ba 6. Ki kyndon, ki jingpynwandur, bad ki rukom treikam jong ki shlem Panchayati Raj ki ïapher bak-ly-bak na ki Autonomous District Council. Kumta ban pynbor ïa ka rukom synshar Panchayati Raj ha ki shnong jong ngi, kam dei tang ba ka long kaba pyrshah ïa ka Riti Synshar ka ri hynrei ka dei ruh ka jingpynkheiñ ïa ka riti-dustur bad synshar-khadar tynrai jong ki briew jong ngi,” ki la ong.
Ki Nokma ki la pynkynmaw ba ki ai ïa ki kot ki sla jong ki, ki kam shnong, bad ki ‘Wareng Map’ tang sha ka Autonomous District Council bad ym sha kano-kano ka shlem Panchayati Raj.
“Ym don ophis jong ka Panchayati Raj ha ka thaiñ jong ngi, bad kane ka rukom synshar kam pat ju treikam ha ki shnong jong ngi. Ka bor ban peit ïa ka roi ka par, ka bha ka miat, bad ka jingsynshar ha ka thaiñ jong ngi ka shong tang ha ka Garo Hills Autonomous District Council (GHADC), hapoh ka Khyrnit ba 6. Ka Panchayati Raj kam don bor ne hok ban tuklar ïa ka jingsynshar ha ki shnong kiba hap hapoh ki jaka jong ka Khyrnit ba 6,” ki la bynrap.
Ki Nokma, haba pynrem jur ïa ka jingkynnoh jong ka Sorkar ban pyrshang pynïar jubor ïa ka rukom synshar Panchayati Raj sha ki jaka ba hap ha ka Khyrnit ba 6, ki la byrngem ban pyrshah jur bad kyntait ïa ka PAI. Ha kane ka jingïalang la shim ruh ïa ka rai ban aiti ïa ka dorkhast sha ka tnad Tribal Affairs, ka Sorkar India, kumjuh sha ka Sorkar Meghalaya, da kaba pynpaw ïa ka jingpyrshah kaba jur bad dawa ba dei ban burom bad ïada pura ïa ki hok bad iktiar jong ki Autonomous District Council.
