Shillong, Risaw 03
Ka Rangdajied United ka la pynïoh ïa ka jingjop kaba donkam eh pyrshah ïa ka Malki da 4-1 kol ha ka jingïalehkai jong ka Shillong Premier League 2025 ha madan ïalehkai SSA First Ground, Polo, ha ka 03 tarik Risaw 2025.
Ka Rangdajied ka la thep kol lyngba u Denelson Pyngrope (16’P), u Pasborlang Khonglikong (64′), u Wansiewdor Nengnong (76′) bad u Freddy Jyrwa (79′). Katba ka Malki ka la ïoh thep da u Hilford Lyngkhei (39′).
Kadei tang kane ka jingjop kaba ar jong ka RUFC ha kane ka samoi – mynshwa ka la jop 1 sien, ïakhaid 3 sien bad rem 2 sien – Lyngba kane ka la ïoh 9 poiñ bad ka kyrdan kaba hynriew ha ka thup. Ki ïakhaid bad ka Sawmer ha ka jingïoh poiñ bad kham ïoh bun pat haba nujor ha ki kol (-1 haduh -8) hynrei ka Sawmer ka don ïa ka jingmyntoi ban ïaryngkat hadien ba ka la jop pyrshah ïa ka Rangdajied ha ka 10 tarik Nailur. Ka Malki ka dang sah ha ka kyrdan kaba 8, kaba dang shu lait na ka jingshah pynhiar kyrdan, da 6 poiñ.
Ka Rangdajied United FC ka la ïoh ban thep saw kol, ha kaba u Denelson Pyngrope u la pynïoh da ka penalty bad thep kol ha ka minit kaba 16, u Pasborlang Khonglikong u la ïoh ban thep kol na jngai ha ka minit kaba 64 bad u Wansiewdor Nengnong u la thep kol ha ka minit kaba 76, bad u Freddy Jyrwa u la thep ïa ka kol ha ka minit ba 79.
Katba u Hilford Lyngkhei ka Malki shuwa ban kut ka jingïalehkai u la thep kol kaba wan lyngba ka free-kick kaba la hap hapoh ka phyllaw kol.
Ha ki hynriew tylli ki jingïakhun ba la dep ka Rangdajied ka la ïoh ban thep tang saw tylli ki kol baroh, kumta ka la lah ban kyntiew ar shah ïa ka jingthep kol jong ka tang ha kane ka jingïalehkai. Watla ka jingjop ïa ka SPL 2025 ka long tang kum ka jingphohsniew kaba dang jngai ban lah pynurlong, hynrei kin kwah ban ïalehkai bha katba ki dang khmih lynti ban pyndep ha ka Top 6, kaba lah ban buh ïa ki ha ka jingïakhun na ka bynta ka SSA Super Cup, kaba dei ban bud hadien kane ka lympung SPL.
Ka Mawlai kan ïalehkai biang pyrshah ïa ka Laitkor ha ka por 4:30 janmiet. Ka Mawlai kaba don ha ka kyrdan kaba lai ka la shah rem ha ka Shillong Lajong ha ki khyndiat sngi mynshwa bad ka donkam ban khie im biang ïalade na kata ka jingshah rem. Katba ka Laitkor kaba don ha ka kyrdan kaba hynñiew, ka don ha ka jingïakhun kaba khlem shah rem satia bad kan thmu ban pynneh ïa kata ka jingïakhun pyrshah ïa ka Mawlai.
