Shillong, Risaw 05 (UNI)
U Justice Soumen Sen un bam smai kum u Chief Justice bathymmai jong ka Meghalaya High Court ha ka 8 tarik u Risaw. U Sen un long u Chief Justice uba 14 jong ka Meghalaya High Court.
U Lat ka Jylla, u Chandrashekhar H. Vijayashankar un sa pyntian smai ïa u Sen ha Raj Bhavan.
U Justice Hamarsan Sing Thangkhiew u la treikam kum u Acting Chief Justice jong ka Meghalaya High Court hadien ba u Chief Justice Indra Prasanna Mukerji u la shongthait noh na kane ka kyrdan ha ka 5 tarik Nailur, 2025, haba u la kynjoh ïa ka rta ban shongthait.
Ka President ka ri, ka Droupadi Murmu ha ka 26 tarik Nailur ka la thung ïa u Sen, uba long mynta u nongbishar jong ka Calcutta High Court kum u Chief Justice jong ka Meghalaya High Court hadien ka jingai jingmut jong ka Supreme Court Collegium.
Un shimti ïa ka kam jong u naduh ka tarik ba la pynsmai ïa u.
La kha ïa u Sen ha ka 27 tarik Naitung, 1965, ha Kolkata. Hadien ba u la pyndep ïa ka jingpule skul na St. Lawrence High School, u la pyndep ïa ka kyrdan pule ‘Graduate’ ha ka LL.B na ka University of Calcutta ha u snem 1990, da kaba ïoh ïa ka ‘mark’ kaba heh tam bad wan banyngkong ha ka eksamin.
U Sen u la pynrung kyrteng kum u ‘Advocate’ hapoh ka Bar Council jong ka West Bengal ha u Kyllalyngkot, 1991 bad u la trei kum u nongsaid aiñ ha Calcutta High Court hashuwa ba un shah kyntiew kyrdan kum u nongbishar jong kane kajuh ka Ïingbishar ha ka 13 tarik u Ïaïong, 2011.
