Shillong, Risaw 05
Ka ïingbishar Meghalaya High Court ka la phah da ka notis sha ka All Khasi Meghalaya Tourist Taxi Association (AKMTTA) haba jubab ïa ka Public Interest Litigation (PIL) ba la ujor da u President jong ka Meghalaya Rural Tourism Forum (MRTF) u Bah Alan West Kharkongor.
Ïa ka PIL la ujor ha ïingbishar High Court hadien ba ka AMKTTA dang shen ka la khot pynlong ïa ka jingïakhih ba khlem pud sngi ban pyrshah ïa ka jingrung jong ki kali kamai tourist kiba nabar ka jylla Meghalaya sha ki jaka jngohkai pyrthei kiba don ha kylleng ka jylla.
Ka Bench, kaba kynthup ïa u Acting Chief Justice HS Thangkhiew bad u Justice Bhatta-charjee ha ka hukumba la pynmih ha ka 22 tarik, Nailur, ka la bthah ban phah da ka notis sha ka AMKTTA. Ka ïingbishar ka la buh sngi ban pynmih hukum shuh-shuh halor kane ka kam ha ka 14 tarik, Risaw, 2025.
Ka shithi ba la phah da Deputy Registrar ka ïingbishar sha ka AKMTTA ha ka 25 tarik, Nailur, ka la ong, “La khot ïa phi ban wan mih bad ai jubab kumba la bthah ha ka hukumba la kdew hanenghapoh 14 sngi naduh ba la pynpoi ïa kane ka jingpynbna. Yn sa bishar ïa kane ka kam shen hadien kata katba ka kam jong ka ïingbishar ka lah ban ailad, hynrei yn ym ai jingtip shuh ïa kum kata ka tarik. Lada phim wan mih dalade ne da u nongïasaid aiñ jong phi ne da uno uno uba la aibor da ka aiñ ban leh na ka bynta jong phi ha ka tarik ba la khot hajir/bishar, ïa ka kam yn sa bishar bad shim rai ha ka jingbym don jong phi.”
Ka AMKTTA ka la dawa ïa ka Sorkar Jylla ban thaw ïa ka polisi ka ban weng ïa ki jingeh jong ki nongñiah kali kamai Tourist hapoh ka jylla.
