Shillong, Risaw 05
Wat hapdeng ka jinghap jong slap ha ka jylla, ka jingtrei ïa ka surok Shillong Western Bypass kaba la ap khmih lynti bha ka dang ïaid shakhmat, ha kaba ki bor ba pyntreikam ki dang pynkhreh ban nangpynjur ïa ka jingtrei namar ba ka aiom trei ka dang sdang ha Meghalaya.
Katkum ki tyllong khubor, ka jingtrei hapoh ka Package I mynta ka dang long hakhmat ban ïa ka por ba la buh ban pyndep, katba ka jingïaid shaphrang halor ka Package II bad III ka dang ïaid kumba la thmu.
Ïa ka surok Shillong Western Bypass kaba jrong 38.256 km la pyntreikam ha ki lai tylli ki package. Ïa ka Package I kaba jrong 12.80 km, kaba la mang jinglut haduh T.620 klur, la pyntrei da ka Anusha Projects Pvt. Ltd. bad ka BKD Infrastructures Pvt. Ltd. hapoh ka jingïatreilang.
Hynrei ki tyllong khubor ki la maham ba ki katto katne ki jingeh ki lah ban mih, namar kan donkam ban ot khyndew kaba heh ha ki katto katne ki bynta – khamtam ha ka Package I – ha kaba katto katne ki bynta jong ki lum ki jrong haduh 60-70 meter.
Ïa ka Package II kaba jrong 11.99 km, ha kaba ka jinglut jong ka projek ka long T.686 klur, la shimti da u Narendra Sharma bad ka TK Engineering Consortium Pvt. Ltd. hapoh ka jingïatreilang. Ïa ka Package III kaba lai bad kaba khatduh, kaba jrong kumba 13.56 km, la pyntreikam da ka BRN Infrastructures Pvt. Ltd. ha ka jinglut kaba T.562 klur.
Da ka jingthmu ban pynduna ïa ka jingdheng kali kaba ïai bteng ha nongbah Shillong, ïa kane ka projek Western Bypass la khmih lynti ba yn lah ban pyndep hapoh arsnem naduh ba la sdang ban tei.
