Shillong, Risaw 05
Palat 17 ngut ki briew ki la duh noh ïa la ka jong ka jingim ha Darjeeling, West Bengal namar ka jingther u ‘lapbah bad twa khyndew ha Mirik. Ka jingtwa khyndew kaba jur bha ka la wanrah ïa ka jingshah pynjulor jong ki ïing ki sem, ki jingjulor jong ki surok, ka jingdkut jong ki jingkieng.
La ongba ka bynta jong ka Darjeeling ha North Bengal ka la sakhi ïa ka jingther jong u ‘lapbah ba jur bha, kaba la lam sha ka jingtwa khyndew ha ki thaiñ kiba bun kynthup ha Mirik bad SukhiaPokhari. Halor kane ka jingjia twa khyndew, na ka liang jong ki pulit bad ki bor pynïaid district ki la sdang ïa ka kam ïarap ban pyllait im.
Halor kane ka jingjia twa khyndew kaba jur bha bad ka jingduh jong ki mynsiem briew, na ka liang jong ka Myntri Rangbah ka West Bengal ka Mamata Banerjee ka la pynlong ïa ka jingïalang bad u Chief Secretary, DGP, ki District Magistrate bad ki SP jong ka North Bengal.
Ki pulit jong ka West Bengal ki la ong ba kane ka jingtwa khyndew ka la ktah jur ïa ka ïaid ka ïeng jong ki kali ha kiba bun ki surok, kaba la pynlong ïa ki nongleit nongwan bad ki nongshang kai pyrthei ban sahkut. Ha ka jingthoh ba la buh ha ka rynsan X, ki pulit ka West Bengal ki la ong, “Namar ka jingther jong u ‘lapbah ba jur ha ka miet kaba la lah, ka jingtwa khyndew ka la jia ha ki katto katne ki surok ha Darjeeling, kaba la ktah ïa ka leit ka wan. Ka kynhun jong ngi, ka dang trei shitom ban pynkhuid ïa ka surok, bad la khmih lyntiba ha ki khyndiat por yn sa lah ban pyllait noh ïa ka jingdheng kali. Ki nongjngohkai pyrthei kiba la sahkut lane kiba donkam jingïarap ki lah ban phone sha ka Darjeeling Police Control Room ha u +91 91478 89078.”
Ka Myntri Rangbah ka Mamata Banerjee ka la pynpaw ïa ka jingsngewkhia halor ka jingshlei um ha North bad South Bengal. Ka la ong, “Ka jingther kynsan jong u ‘lapbah ba jur ha ka miet ba la lah, uba la palat ïa ka 300 mm ha ki 12 kynta ha North Bengal, ka la wanrah ïa ka jingheh jong ka jingtuid jong ka um ha ka wah Sankosh kaba la wanrah ïa kane ka jingjia lynshop.”
Kumjuh ruh na ka liang jong ka President ka Ri ka Droupadi Murmu ka la pynpaw ïa ka jingsngewsih halor ka jingduh noh ïa ki mynsiem briew ha ka jingdkut jong ka jingkieng ha Darjeeling. Ha ka jingthoh ba ka la buh ha ka rynsan X, ka President Murmu ka la ong, “Ka jingduhnoh ïa ki jingim briew na ka daw jong u slap ba jur bad ka jingtwa khyndew ha Darjeeling, West Bengal, ka long kaba sngewsih. Nga pynpaw ïa ka jingsngewlem sha ki longïing kiba la duh noh ïa la ki baieid ba thoin. Nga duwai na ka bynta ka jingjop jong ki kam pyllait im bad ai jingïarap bad kitbok ïa kito kiba mynsawba kin ïoh noh ka jingkoit kaba kloi.”
U Myntri Rangbahduh ka Ri u Narendra Modi ruh u la buh ïa ka jingthoh ha ka rynsan X bad pynpaw ïa ka jingsngewlem ka jong u. U la thoh, “Nga sngewsih jur ïa ka jingduhnoh ïa ki mynsiem briew namar ka jingdkut ka jingkieng ha Darjeeling. Ka jingsngewlem sha kito kiba la duh noh ïa kiba ieid ba thoiñ jong ki. To ai ba kiba mynsaw kin koit noh kloi. Ïa ka jinglong jingman ha Darjeeling bad ki jaka ba marjan la buddien bha hadien ka jingjur jong u slap bad ka jingtwa khyndew. Ngi la shimkhia ban pynbiang ïa baroh ki jingai jingïarap katba lah sha kito kiba shah ktah.”
