Shillong, Risaw 05
U Bah Lahkmen Rymbui Myntri ba khmih ïa ka tnad pule puthi ka Jylla u la ai jingïaroh ïa u Myntri Rangbah ka Jylla u Conrad K Sangma uba la treishitom ban ai ka jingshakri kaba bha tam ïa ki nongshong shnong ka Jylla Meghalaya da kaba u buh ha khmat duh ïa ki bynta ba kongsan kum ka koit ka khiah, ka pule puthi bad ki kam pynroi.
U Bah Lahkmen Rymbui u la ong ba watla ka ïoh ka kot ha ka Jylla ka duna, hynrei u Myntri Rangbah ka Sorkar Jylla u la ïaleh ban treishitom ban pynbeit ïa ka jingdawa ki nonghikai ban pynbha ïa ka pule puthi bad ka jingnang jingstad hapoh ka Jylla.
U la pynkynmaw ruh ïa ka jingdawa ki nonghikai Ad-hoc ba dang shen, da kaba u la ong ba “ka long ka bynta ban pynkylla ïa ka rukom siew tulop ba thymmai bad ka Dearness Allowances (DA) ba shisien shi snem, kumjuh ka ‘Centralized Providents Fund’ bad ka Death-cum Retirement Gratuity kine ki jingpynkylla, ki thmu ban pynthikna ïa ka ïoh ka kot ki nonghikai bad ban pynkyntiew ïa ka jingnang jingstad ha ka Jylla.”
U Bah Lahkmen u la ong, ha u snem 2022 ka sorkar ka la pyrshang ban pynkiew katba lah ïa ka tulop jong ki nonghikai, watla ka jingpynkiew tulop ïa ki nonghikai ka duna b ad la leh ïa kane dei na ka bynta ka jingbha jong ka pule puthi hapoh ka Jylla.
Shuh-shuh ruh u Bah Lahkmen u la pynpaw ba u Myntri Rangbah un sa peit bniah, kumno ban leh ban pynkiew tulop ki nonghikai bad ong ruh ba hap ban peit ryntih na baroh ki liang jong ki nongshong shnong.
U Bah Lahkmen u la ong, “kam dei kaba suk ban leh ïa kane ka kam, namar ka dei ban don ka jingsngewthuh jingmut hapdeng ka Sorkar bad ki paidbah, kyrmen ruh ba kane ka rai jongu Myntri Rangbah kan wanrah ïa ka jingkylla ha ka rukom pyrkhad ki nongshong, khnang ba ha kine ki ar lai bnai, yn lah ban pynbeit ïa ka jingeh ki nonghikai.”
