Shillong, Risaw 05
U Bah Lahkmen Rymbui u Myntri ba dei khmih ïa ka tnad Disaster Management u la pynpaw ka jingsngewkmen ba ka Sorkar Pdeng ka la bhah jingïarap pisa haba ïadei ka jingpynheh ïa ka surok Shillong-Dawki.
Haba ïadei ka surok Shillong-Dawki kaba dang don hapdeng ka jingshna ban pynheh u Bah Lahkmen Rymbui u la pynpaw ka jingsngewkmen ba ka Sorkar Pdeng ka la mynjur ban ai jingïarap na ka bynta ka jingpynheh bad pynbha ïa ka surok, ka ban long ka jingïarap ban kyntiew ïa ka ioh ka kot jong ki paidbah nongshong shnong ka thaiñ bad ka jylla baroh kawei, khamtam ruh ba katei ka surok ka dei kaba pynïasoh ïa ka Tamabil Export Point bad ka Ri Bangladesh.
U Bah Lahkmen u la pynpaw ruh ka jing-sngewkhia haba ïadei ka jingjia twa khyndew bad jinghap ki maw dang ha ki khyndiat sngi ba la dep, kaba la jia namar ka jingpyntrei ban pynheh pynbha ïa katei ka surok ka dang ïaid shakhmat.
U Bah Lahkmen u la ong, halor kane u SDO ka Pynursla u ba long kum u Chairman ka District Disaster Management u la pynlong ka jingpeit bniah ïa katei ka jaka, namarkata ka daw bunsien ka don ka jingpyrkhing ïa ka leit ka wan ki kali khamtam ha ka por ba slap bad u la ai jingïaroh ruh ki bor pynïaid ka East Khasi Hills District ïa ka jingshimkhia jongki ba peitngor bad ban ai jingmaham ïa ki nongleit nongwan bad ban pyntip ruh ban iaid ha ka por ka ba dei.
Shuh-shuh u la ong, “ha kine ki khyndiat bnai ba la dep, ngi la iohi ba ka jingtwa khyndew, ki jingjia ba sngewsih ki jia ha kaba ki la don ruh ki briew kiba la duh noh ka jingim bad man ka sngi ka don kaei re kaei ka ba jia”
U la ong ba, kyrmen ba ka kompeni kaba pyntrei ïa katei ka surok kan pyniaid sted ïa ka jingtreikam jongka mar ïa kut ka aiom slap, khnang ba ynlah ban pyndep kham kloi bad ban lait na ki jingjia twa khyndew ka ba buh ha ka jingma ïa ki nongleit nongwan.
