Shillong, Risaw 05
U Rangbah Shnong barim ka Bhoirymbhong, Ri-Bhoi District Bah ST Rympei uba dang shah pynhiar shuki tang ha kine ki khyndiat sngi u la ïathuh ba um tip na kaei ka daw ba ka tnat shangkai pyrthei jong ka Sorkar jylla kam shym la pynlong shuh ïa ka Cherry Blossom mynta u snem ha Bhoirymbong.
U la ong ka jingrah ka Sorkar ïa ka tamasa Cherry Blossom sha Shillong mynta u snem kan buh jingeh ïa ki paidbah nongleit nongwan namar kane ka tamasa ka dei kaba heh bha.
U la ong ha kine ki ar snem ba la pynlong ïa kane ka tamasa ka long kaba ïaid beit ïaid ryntih namar ka jaka ïeng kali kaba biang bad ki briew nabar jylla kum na Assam ki suk namar ka long pdeng ïa kiba sah na Shillong ruh.
“Ngam tip na kaei ka daw ba ka Sorkar jylla ka rah noh sha Shillong hynrei haba nga kylli na ki nongpynïaid ïa kane ka tamasa ki la pyntip ba kane ka dei ka rai ka Sorkar jylla,” u la ong.
Shuh shuh u Bah Rympei u la pyntip ba lada khlem pynlong shuh ïa ka tamasa Cherry Blossom sha Bhoirymbong ka jingduhnong kan long ïa ki paidbah naduh kiba die dukan, ka bylla sngi, ki Guest House kiba bun ba la shna.
U la ïathuh ba ki nongjngohkai ki kwah ban pynlong ha nongkyndong namar ki kwah ban shangkai mynsngi namar don kiba leit sah ruh shaduh Mawlasnai bad janmiet ki la leit sha Cheery blossom.
Shuh shuh u la pynpaw ba lada pynlong ha Shillong kaba nyngkong ka dei ka jingeh ha ka jingdheng kali, ki nongjngohkai kin sa ïakynduh jingeh haba bun ki liang.
Ha kane ka tamasa Cherry Blossom ban long mynta u snem ha JN Stadium Polo, Shillong bad Nan polok kan dei ha ka 14 bad 15 tarik Naiwieng, 2025.
