Shillong, Risaw 05
U coach ka India, u Khalid Jamil ha ka sngi U Blei u la pynbna ïa ka kynhun ki 23 ngutk ki rangïalehkai, ki ban leit sha Singapore ban pynkhreh ïa ka jingïakhun ïa ka AFC Asian Cup Saudi Arabia 2027 Qualifiers Final Round jong ka Group-C pyrshah ïa ka Singapore.
Te kumta ka Singapore kan pdiang ïa ka India na ka bynta ka jingïakhun ha National Stadium, Singapore, ha ka 9 tarik mynta u bnai ha ka por 5 baje janmiet.
Ka India ka la kilanmet ha Bengaluru naduh ka 20 tarik u Nailur kum shi bynta ban pynkhreh ïa ka jingïakhun pyrshah ïa ka Singapore, ha kaba ka jingïakhun ha la ïing la thmu ban long ha ka 14 tarik mynta u bnai ha Pandit Jawaharlal Nehru, Goa. Kane ka jingïalehkai kan sdang ha ka por 7:30 janmiet. Kane ka kynhun kan leit sha Singapore ha ka step jong ka lah sngi U Blei bad kan poi ha ka por janmiet.
Kumba ka long mynta ka India ka don ha ka kyrdan shatrai jong ka Group-C da kaba kamai tang shi poiñ na ki ar tylli ki jingïakhun, katba ka Singapore ka ïeng ha ka kyrdan ba hakhlieh duh da kaba kamai 4 poiñ. Ka kynhun ka ban poi sha ka kyrdan ba hakhlieh duh kan ïoh rung sha ka AFC Asian Cup Saudi Arabia 2027.
Shi sngi ba kane ka kynhun kan mih, na ka liang u Jamil u la pynpaw ïa ka jingdonkam ban ïalehkai bha ha ki jingïalehkai kiba dangsah.
“Ngim pat lah ban khmih bha baroh kawei ha kane ka por, ki dangdon saw tylli ki jingïakhun kiba dangsah, bad ka jingïalehkai ban wanrah ka jingkylla pyrshah ïa ka Singapore ka dei kaba kongsan tam na ka bynta jong ngi mynta hi,” u la bynrap da kaba ong. “Ngim lah ban pynthikna lypa ban poi shakhmat, hyneri ngi dei ban ïaid suki pa suki na ka bynta ban jam sha kawei pat ka sien jam.”
Watla ka India ka dangïaid lynti na ka bynta ka jingïalehkai shabar na la ïing pyrshah ïa ka Singapore ryngkat bad ka kynhun kaba don 23 ngut, pynban u Jamil u la buh kyrpang ïa arngut ki rangapkol kata u Hrithik Tiwari bad uwei pat u rangïalehkai shakhmat u Muhammed Suhail na ka bynta ka jingïakhun ha la ïing ha ka 14 tarik mynta u bnai.
“Watla ngin leit bad 23 ngut ki nongïalehkai hynrei ngi ïai buddien beit ïa kiba sah. Ïa mynta, u Hrithik bad u Suhail la buh lypa na ka bynta ki ar tylli ki jingïakhun pyrshah ïa ka Singapore” ong u Jamil.
Ki 23 ngut ki rangïalehkai ka India ban leit sha Singapore
Goalkeeper: Amrinder Singh, Gurmeet Singh & Gurpreet Singh Sandhu.
Defender: Anwar Ali, Hming-thanmawia Ralte, Muhammed Uvais, Pramveer, Rahul Bheke & Sandesh Jhingan.
Midfielder: Brandon Fernan -des, Danish Farooq Bhat, Deepak Tangri, Macarton Louis Nickson, Mahesh Singh Naorem, Nikhil Prabhu, Sahal Abdul Samad & Udanta Singh Kumam.
Forward: Farukh Choudhary, Lallianzuala Chhangte, Liston Colaco, Rahim Ali, Sunil Chhetri & Vikram Partap Singh.
