Shillong, Risaw 05
Ka Khasi Students Union (KSU), Upper Shillong Circle ha ka 04 tarik u Risaw 2025, ka la pynlong ïa ka jingïakop pyni riam tynrai u Khasi ha ka nam u ‘Nai Khatsaw Synñia bad ka Lukhimai’ kaba la pynlong ha u Soso Tham Auditorium, Shillong.
Ha kane ka sngi na ka liang ka KSU, ka la sam ruh ïa Ka Mait Shaphrang Achievers Award-2025 sha ki samla pule kiba la wan sha khmat.
Ha kane ka sngi la ïadon lang u Bah Paul Lyngdoh uba dei u Kongsan ha kajuh ka por ruh uba long teng u President barim ka KSU, u President ka KSU u Bah Lambor Marngar, ki nongbishar ha kine ki jingïakop pyni riam tynrai bad kiwei kiwei de.
Haba kren ha kane ka sngi na ka liang u Bah Paul Lyngdoh u la ong ba lah ban ong ba ka jaitbynriew ba duna paid, hynrei kaba kynrei ha ki sap ki phong.
U la pynpaw ruh ba ha ka samoi trei kam jong u, ha kaba ka ryndia kam sahkut shuh tang ha ka Ri Khasi ki ba ithuh hynrei kiwei ki ri ruh ki ïa ithuh lut.
“Hapoh u snem ba mynta, yn sa plie noh ïa ka Textile Complex kaba dei hapoh Umden, ha kaba lah ban ïoh ïa ki rong bapher bapher. Kum ka Lawkyntang ka dei kawei ka ka jaka kaba pynneh pynsah ïa ka Ri Khasi, ka kheiñ kur kheiñ jait, kaba la sdang jah ha kiwei kiwei pat ki jaitbynriew kiba la bud, hynrei ka Ri-Khasi ka nuksa ban pyni ba ka jaitbynriew Khasi kalong kaba riewspah,’ la ong u Bah Paul.
Ha kane ka jingïakop pyni riam tynrai jong ka ‘Lukhimai’, ki nongïashim ki don haduh 14 ngut ki kynthei bad 14 ngut ki shynrang, kiba ïakop pyni riam ha ka nam ‘U Nai Khatsaw Synñia’ baroh ki long 28 ngut.
La don ha ki lai bynta ka jingjop ba kynthup kiba lai, ki ba-ar bad ki nongjop ne nonglahduh na baroh ki nong ïashim bynta, ki la ïoh la ka jong ka jong ka pisa kat ka jinglah ka jong ki.
Ia ki nonglahduh ha kane ka ïakop pyni riam tynrai la sam da ka momento bad ka song pisa ba T.50 hajar, ki ba ïoh ba-ar ki ïoh momento bad ka song pisa ba T.30 hajar bad kiba ïoh ba lai pat ki ïoh momento bad ka song pisa ba T.20 hajar.
Ka jingsam ïa ka Mait Shaphrang Achievers’ Award-2025, ka long ha ki khynnah kiba pass bha kiba la kot ruh ïa ka 70% shaneng ha ki khynnah klass 10, kiba ladep ïa ka HSSLC, kiba la pyndep ïa ki degree bad kumjuh sha ki 2 ngut kiba la pyndep ïa ka PHD.
