Shillong, Risaw 05
Kumba ki nongdie madan ki dangdon ha ka jingmudui kaba iadei bad ka jaka shong jong ki khamtam eh kaba ïadei bad ka jingpynkynriah jaka jong ki bad ka jingpyntreikam ïa ka aiñ 2014, jong ki nongdie madan ha surok, mynta la pyni ba ki nongdie madan ki la “Shah kynnoh kum ka daw jong ka jingkhapngiah” ha Shillong.
Ka dkhot ba la shah khot sngewbha jong ka Meghalaya and Greater Shillong Progressive Hawkers and Street Vendor Association (MGSPHSVA), ka Kong Angela Rangad, ka la ong ba ki nongdie madan ki la shah tan noh ha ka jingmudui kaba dang ïaid shakhmat kaba mut ban weng ïa ka jingkhapngiah jong ki kali bad ki jaka ïeng kali ha ka Nongbah.
“Mynta, dei ki nongdie madan kiba la shah kynnoh, la ong ba ki dei ki daw jong ka jingkhapngiah ha ka Nongbah”, la ong ka Kong Angela Rangad, da kaba kynnoh ruh ba ki katto katne ki nongtrei sorkar ki shim kabu ïa ka jingshah mudui bad ki buhrieh ïa lade ha lyndet ki hukum jong ka Ïingbishar.
Ka Kong Angela Rangad ka la kdew ba ym pat don kawei ruh ka jingbthah kaba shai ha kaba ïadei bad ka jingpynïeng kali ne ki kali paidbah kaba la mih na katei ka mukotduma haduh mynta. Ka la buh jingkylli kumno, lada ka kam ka dei shisha shaphang ka jingïaid kali bad ka jaka ïeng kali, kawei na ki jaka ïeng kali kaba heh tam ha ka nongbah mynta ka la shah bat ha ki nongdie madan, khlem da iehnoh jaka shuh ïa ki kali. “Bad lada phi peit, ki jaka na kaba la weng noh ïa ki nongdie madan-khamtam eh ki long ha ka jingshisha ki jaka kiba biang bha na ka bynta jong ki. Mynta ba la weng noh ïa ki, kine ki jaka ki la kylla long kiba jyllei da ki jaka ïeng kali be-aiñ. Kumta, mano ban shim ïa ka jingkitkhlieh na ka bynta kane ka dei ka jingkylli kaba heh bha,” ka la kynthoh.
Ka Kong Angela Rangad ka la ïohi shuh shuh ba ki nongdie madan ki la shah kynnoh khlem akor bunsien ba ki pynlong ïa ka jingkhapngiah ha nongbah Shillong.
Haba kylli lada ka seng ka thmu ban leit sha ka Ïingbishar halor ka jingkynnoh bamsap bad ka jingbym ïahap ha kaba ai ïa ki Certificate of Vending (CoVs), ka la ong ba kin sa wad ïa ki lad aiñ lada donkam.
“Kumba ka long mynta, ngin dang bteng ban buddien ïa kane ka kam bad ka Provisional Town Vending Committee (PTVC) ban pynthikna ba baroh ki nongdie madan ba shisha kin ïoh ïa ki CoV jong ki,” ka la ong.
Ka la bynrap ba ïa ka PTVC, kaba la thmu ban treikam shipor kumba shisnem eiei, mynta dei ban bujli noh da ka komiti die madan jong ka sor (TVC) kaba pura – ka rukom treikam kaba dang sahteng ban urlong. “Na ka bynta jong ngi, ka jingthmu ba kongsan ka long beit ban ïada ïa ka jingmyntoi jong ki nongdie jingdie bad ban pynbeit ïa ki jingeh lyngba ka PTVC, khamtam namar ba ka jingtreikam ka la dep ban ïaid shakhmat na ka bynta ka thaiñ Khyndai Lad,” la batai ka Kong Angela Rangad.
Ha kajuh ka por, ka la kdew ba ki bor pynïaid kim pat ai kano kano ka jingkheiñ ïa ka jinglut jingsep na ka bynta ka jingtrei hapoh ka jaka ïeng kali jong ka MUDA, kaba la pynlong ban pynsuk ïa ka jingpynkynriah ïa ki nongdie jingdie.
Lah ban kdew ba ka seng, ha ka 24 tarik u Nailur, ka la ujor sha u heh ophisar jong ka Shillong Municipal Board (SMB) halor kaei kaba ka la batai kum ka jingpynslem khlem daw ban ai ïa ki CoV sha kumba 70 ngut ki dkhot jong ka.
Ka seng ka la kynnoh ba watla ki dei ki nongdie madan ba shisha kiba la don ha ka kam khaii la bun snem, hynrei bun ki nongdie madan ki la shah kyntait na ka jingtreikam namar ki jingbakla, ki jingbym ïahap.
