Shillong, Risaw 05
Ka Nongkseh SC ka la sdang da ka jingjop ha ka lympung ïalehkai 1st Division Football League-2025 ba la pynïaid da ka Shillong Sports Association (SSA), hadien ba ka la pynjem khnap ïa ka Pohkseh SC da 6-0 kol ha ka sngi Saitjaiñ ha SSA Stadium kaba ha First Ground, Polo.
U Chester Paul Lyngdoh u la khur ia ka hat-trick, katba u kapten barim ka Shillong Lajong u Hardy Cliff Nongbri u la thep ar kol.
Kumba ka paw ha kane ka jingïalehkai kaba nyngkong, ka Nongkseh kaba la pynkhlaiñ bha da kaba wanrah ïa ki rangïalehkai kiba kynsai, ka la lah ban pynpaw ïa ka jingtbit naduh kaba sdang. Kane ka kynhun ka la pynkhih jar nyngkong eh lyngba u Shano Tariang ha ka minit kaba 24 na ka bynta ban tam 1-0 kol haduh kaba kut jong ka kylla step.
Hadien lai minit kane ka kynhun hapoh ka jingïalam u Bah Richard Nongneng (coach) ka la pynbud ïa ka kol kaba ar lyngba u Chester Paul bad ïa ka kol kaba ar jong u, u la thep ha ka minit kaba 60 na ka bynta ban tam da lai kol.
Hapdeng kane ka jingïakhun u Hardy u la ïoh ban thep kol ha ka minit kaba 75. U Chester Paul u la thep biang ïa ka kol kaba lai ka jong u ha ka minit kaba 84 na ka bynta ban khur syndon ïa ka hat-trick. Hashwa ban wai u Hardy (90+2) u la thep biang sa shi kol na ka bynta ban pynlong ïa ka Nongkseh ban khur syndon ïa ka jingjop.
