Nongpoh, Risaw 05
Sa kawei de ka jingjia aksident kali kaba shyrkhei kaba la jia ha ka janmiet jong ka sngi U Blei, ha kaba arngut ki briew kila duh noh ïa la ka jong ka jingim bad uwei pat u la mynsaw jur hadien ba kawei ka trok kaba don ïa u registration number ML05-L-4368 ka la leit ban kynthih na shilliang sha shilliang ka surokbah National Highway 6 bad tynrah pat ïa kawei ka Bolero Sorkar kaba don ïa u registration number ML01-7455 kaba dei jong District Sports Office jong ka Resubelapara.
Katkum ka khuborba la ïohlum, la ïathuh ba katei ka la jia ha ka por kumba 8 baje eiei bad la ïathuh ba katei ka kali Bolero jong ka Sorkar ka dei kaba dang kiew sha nongbah Shillong, katba katei ka trok pat, kaba la pynher sted bha bad thylli ka dei kaba dang hiar sha ka nongbah Guwahati.
Ki arngut ki briew kiba la khlad hashen ha kane ka jingjia, ki dei kiba la tip kyrteng kum u Sanbirth M Momin, uba dei u nongñiah jong katei ka kali Bolero bad u Smart Sangma katba ki lai ngut kiwei pat kiba la mynsaw ki long u Nilkash M Momin uba shong ha ka kali Bolero, u Anil Dorjee uba dei u nongñiah jong ka trok bad u BibashThapa uba dei u nongbud jong ka trok.
La iathuh ruh ba ha katei ka jingjia, katei ka kali Bolero ka la pra hi phom kat haduh ba arngut ki rangbah kiba shong hapoh ki la khlad ha shen bad u nongñiah u la ngat ha ka jingmynsawjur bad katei ka trok ruh ka la kylla lyndang syndon.
Ïa kitei kiba la mynsaw ha katei ka jingjia, la pynkit noh sha Civil Hospital Nongpoh na ka bynta ban pynïoh ïa ka jingsumar kaba kloi. Na ka liang ki bor pulit kiba la poi ha katei ka jaka ki dang pynlong ïa ka jingtohkit.
