Shillong, Risaw 05
Ka Mawlai ka la wanphai da ka jingjop hadien ba ka la lah ban pynliem noh ïa ka Laitkor da 4-0 kol ha ka lympung ïalehkai Shillong Premier League 2025 ha ka sngi Saitjaiñ kaba la long ha SSA Stadium kaba ha First Ground, Polo.
Ïa kine ki saw tylli ki kol la thep da u Robertson Khongriah (45), Ricky Chyne (60), Loving Suting (77) bad u Damitre Kynjing (83), kaba la pynlong ïa kane ka kynhun jong u Bah Hering Shangpliang (coach) ba kan kiew biang sha ka kyrdan ba nyngkong ha ka miej ïakheiñ point, katta hadien ba ka la ïoh ba kan khur 15 point, kham hakhmat ïa ka Nangkiew Irat kaba don ha ka kyrdan kaba ar, kaba la ïoh 13 point, ïa ka kyrdan balai ïa mynta la bat da ka Shillong Lajong, kaba la ïoh ban khur 12 point.
Haba phai sha ka Laitkor, da kane ka nam rem ka la ïai neh ha ka kyrdan kaba hynñiew hadien ba ka la ïoh ban khur 8 point.
Kumban shu pynkynmaw ba ka Mawlai ka wan rung sha kane ka jingïakhun hadien ba lai sngi shwa kane ka jingïakhun ka la mad ïa ka jingshah rem kaba long da 4-3 ha ka Shillong Lajong FC, kaba jia long ba hadien ba ka la lah ba kan tam shwa da 3 kol, hynrei ha kaba kut ban mad pat ïa ka nam rem.
Katba na ka liang ka kynhun ïalehkai ka Laitkor ka rung sha kane ka jingïakhun pyrshah ïa ka Mawlai khlem shah rem ha ki lai tylli ki jingïakhun kiba ka la dep, ha kaba ar tylli na kine ki dei kiba ka la lah ban ïakhaid.
Ïa ka rukom ïalehkai bha jong ka Mawlai ka wan ba kan mih paw ha ka por ba ka la wan ba kan bteng ïa ka kylla miet, kaba hangne hi la shem bad ïohi ïa ka rukom ïalehkai kaba tbit bha jong ki rangïalehkai.
Wat la katta ruh na ka liang ka kynhun ïalehkai ka Laitkor kam shym la pyndem satia ïalade, ha kaba ka la iai pyrshang ba kan wanphai lem sha ka thong ka jingiakhun, hynrei kaba kut hi ka long ba kam shim la lah ba kan pynpra ïa ka kut ïalehkai kaba skhem jong ka Mawlai.
Ka jingïalehkai ha ka lah sngi U Blei kan long hadpeng ka kynhun kaba bat ia ka kyrdan kaba san ka Sawmer SC pyrshah ïa ka kynhun kaba bat ïa ka kyrdan balai ka Shillong Lajong FC ha ka por 4:30 nohphai sngi.
