Shillong, Risaw 05
U khlur nongkawang sum jong ka ri India, u Navdeep Singh, u la ïoh biang sa kawei ka takma, ha kaba u la ïoh ban khur ïa ka takma rupa ha ka final jong ka Javelin Throw F41 ki shynrang jong ka lympung ïalehkai World Para Athletics Championships ha ka sngi U Blei ha nongbah Delhi.
Ha kane ka jingïakhun u Navdeep u la lah ban pynpaw ïa ka jingkhlaiñ bor da kaba u la lah ban kawang 41.38 hashwa ba un bteng biang ïa ki jingpyrshang jong u. Hynrei, tang hadien katto katne por, ha ka jingpyrshang kaba lai, une u nongïa-lehkai jong ka ri u la lah ban pynpaw ïa ka jingtbit da kaba u la lah ban kawang ha ki 45.46m na ka bynta ban bat ïa ka kyrdan ba-ar.
Lyngba kane ka takma, ka jinglah ban khur takma ka India ha ka World Championships ka la kynjoh sha ki 21 tylli.
U Navdeep Singh uba la khur ïa ka takma ksiar ha ka javelin throw F41 ki shynrang ha Paris 2024, u la lah ban thaw ïa ka rekod thymmai jong ka Paralympic da kaba u la lah ban kawang ha ki 47.32m na ka bynta ban khur ïa ka takma ba nyngkong eh jong ka India ha kane ka kyrdan.
Ka jingïoh khur takma u Navdeep kaba la jop ïa ka takma ka la tam noh ïa ka rekod ba mynshwa jong ka Paralympic kaba long 47.13m, kaba la buh da u Sun Pengxiang jong ka ri China ha Tokyo 2020.
