Khliehriat, Risaw 06
Ka Byndihati CSC ka la rung sha ka phainal ha ka lympung ïalehkai 1st Division Football Tournament ba la pynïaid da ka East Jaiñtia Hills District Football Association (EJHDFA), hadien ba ka la pynliem noh ïa ka Musniang SC lyngba ka tie-breaker da 5-4 kol ha ka lah sngi U Blei.
Ha kane ka jingïakhun semi final kaba la long ha madan artificial turf Diengshynrum kaba ha Khliehriat, kitei ki kynhun ki la ïathep mar 2-2 kol. Ka Byndihati ka la pynkhih jar nyngkong eh lyngba u Bhalangme Tariang ha ka minit kaba 24 na ka bynta ban tam shi kol ha ka kylla step.
Hadien ba la bteng ïa ka kylla miet ka Byndihati ka la pynbud biang ïa ka kol kaba ar lyngba u Tenligent Dkhar ha ka minit kaba 52. Hynrei hadien katto katne por ka Musniang ka la pynphai kylla lyngba u Eleven Biam (76) bad kawei pat hashwa ban wai lyngba u Nikerda Dkhar (90) na ka bynta ban ïakhaid mar 2-2 kol.
Na ka liang ki bor pynïaid ki la ailad ba kin ïakhun ïa ka extra time, hynrei ym shym la don ba lah ban thep kol. Dei ha ka jingïashut ïa ka tie-breaker ba ka Byndihati ka la jop da 5-4 kol.
Da kane ka jingjop ka Byndihati CSC mynta ka la kiew kyrdan sha ka Super Division ha kaba kan ïoh ban shim bynta ha ka samoi ïalehkai ka ban wan.
