Shillong, Risaw 06
U Myntri ka Sorkar Jylla, Bah Sosthenes Sohtun u la ban jur halor ka jingdonkam ban pynkloi noh ïa kylla ba-ar jong ka jingïakren khappud bad ka Assam.
U Bah Sohtun uba dei ruh u dkhot uba don bynta jong ka Regional Committee, haba kren sha ki lad pathai khubor ha ka Lah Sngi U Blei u la ong ba ki jingïakren ki dang ïaid shakhmat ban pynsted ïa kane ka kam, ka ban ïarap ruh ban weng ïa ki jingartatien hapdeng ki nongshong shnong khappud kumjuh ban ïarap ha ka ban wanrah ïa ka jingim kaba suk ba saiñ.
“Ngi don ha ka kylla kaba ar jong ka jingïakren khappud. Ngi la don ka jingïakren bad u Chairman ka Regional Committee ba lada ngi lah ban pynkloi noh ïa ka kylla kaba ar, khnang ba kan weng ïa ki jingartatien jong uwei-pa-uwei u nongshong shnong uba shong ba sah ha khappud. Ki briew kiba shong basah ha ki khappud ki kwah ban im suk im saiñ khnang ba kan ym don kano-kano ka jingpynthut na kano-kano ka liang”, u la ong.
Ka jingïa-ka-jia pud hapdeng ka Meghalaya bad Assam ka la neh da ki phew snem mynta, ha kaba ki don 12 tylli ki jaka kiba kum kine.
Ha u bnai Lber, 2022, ki ar tylli ki Jylla ki la ïasoi ïa ka jingïateh kular (MoU) ban pynbeit ïa hynriew tylli na ki 12 tylli ki jaka kiba don hapdeng ka jingïakynad.
Ka kylla kaba ar jong ka jingïakren ka thmu ban pynbeit ïa ki 6 tylli kiwei pat ki jaka kiba dang sah, kiba kynthup ïa ka Langpih, Borduar, Deshdoomreah, Block I-II, Psiar-Khanduli, bad Nongwah-Mawtamur.
Ha u bnai Jylliew, baroh 2 ngut ki Myntri Rangbah – Conrad K. Sangma bad u Himanta Biswa Sarma ki la lum jingïalang ban ïakren halor ka mat jong u pud u sam, nalor kiwei-kiwei ki kam.
Ki la mynjur ruh ban pyntreikam lang ïa ka ‘Multi-purpose Irrigation and Hydroelectric Power Project’ bad la bynshet kam ha ka North Eastern Space Application Centre (NESAC) ban pynlong ïa ka jingwad bniah halor ka jingshlei um ha sor, ha Guwahati.
Kine ki ar Jylla ki la sdang ruh ban buh ïa ki mawpud ha ka thaiñ Hahim ban pynbeit ïa ka jing-ïa-ka-jia pud.
