Shillong, Risaw 06
Ka Meghalaya Police Football Team ka la bteng biang ïa ka jingjop kaba ar ha ka lympung ïalehkai 1st Division Football League 2025 ba la pynïaid da ka Shillong Sports Association (SSA), hadien ba ka la pynliem noh ïa ka Mawkhar SC da 2-1 kol ha ka lah sngi U Blei.
Kane ka nam jop ka la wan urlong lyngba u Rapborlang Marweiñ bad u Pynshailang Lyngkhoi na ka bynta ban pynlong ïa katei ka kynhun ban lamkhmat ha kane ka lympung da kaba kamai 6 point na ki ar sien ïakhun.
Haba phai sha kane ka jingïakhun kaba la long ha SSA Stadium kaba ha First Ground Polo, baroh ar ki kynhun ki la pyrshang ban ïakhun tyngeh naduh kaba sdang, hynrei kim shym la lah ban thep kol haduh kaba kut ka jingïalehkai jong ka kylla step.
Hadien katto katne por ba la bteng ïa ka jingïakhun jong ka kylla miet ba ka MLP ka la ïoh ban thep ar kol lyngba u Rapborlang ha ka minit kaba 56 bad u Pynshailang ha ka minit kaba 67. Hynrei ka Mawkhar ka la lah ban pynphai kylla shi kol lyngba u Kyrshanlang Tariang (76). Haduh kaba kut ka jingïalehkai kine ki kynhun kim shym la lah shuh ban thep bad ka MLP ka la khur ïa ka jingjop.
Lah ban pynkynmaw ha ka jingïalehkai ba la lah, ka MLP ka la jop da 6-0 kol ïa ka Nongrah, katba ka Mawkhar ka la ïakhaid mar 1-1 kol bad ka Mawtawar.
Te kumta ka MLP kan pynkhreh ïa ka jingïalehkai baba lai pyrshah ïa ka Mawtawar ha ka 11 tarik, katba ka Mawkhar ïa ka Nongrah ha ka 13 tarik.
Ka jingïalehkai ha ka sngi Ba-ar kan long hapdeng ka Mawtawar SC pyrshah ïa ka Nongrah SC ha ka por 1:30 mynsngi.
