Nongpoh, Risaw 06
Ki bahaïing hasem jong ki ar ngut ki rangbah na North Garo Hills, kiba la khlad noh ha ka jingjia tyngkhuh kali ha ka miet sngi U Blei ha Umsawnongkharai, ha ka sngi Nyngkong ki la wan poi ha Nongpoh Civil Hospital ban shimti ïa ka met kaba sah jong kitei ki rangbah hadien ba ki pulit lem bad ki bor pynïaid ka hospital, ki la pyndep ïa la ka kamram katkum ki kyndon jong ka aiñ.
Ha ryngkat ki ummat kthang bad ka jingsngewsih, ki bahaïing hasem ha shwa ba kin shimti noh ïa ka metïap jong ki ar ngut, ki la pynlong da ka jingduwai hashwa ba kin rah na ka bynta ban pyndep ïa ka jinglehniam khatduh ha ki shnong ba ki shong ki sah.
Kum ban shu kdew, ki ar ngut kiba la khlad, kata u Sanbirth M Momin u dei u nongñiah kali jong ka Kong Linza Fenny Syiem, District Sports Officer ka North Garo Hills District bad u Smart K Sangma u dei u nongñiah ïa ka kali jong u Bah V Kharbuki, District Agriculture Officer ka North Garo Hills.
La ïathuh ba kitei ki ar ngut ki rangbah kiba la khlad lem bad uwei de u paralok uba la mynsaw jur ha katei ka jingjia, kila wan kiew lang sha nongbah Shillong da ka jingthmu ban leit shaw ïa la ki ophisar ki jong ki ban leit sha Resubelpara, ka jaka ba ki trei, hashwa ba kin shah shim kyndit noh ïa ka jingim jong ki tang namar ka jingñiah khlemakor bad shoh khawiang jong u nongñiah ka trok kaba hiar sha Guwahati, u Anil Dorjee, 22 snem ka rta na ka shnong 15 Mer Nongthymmai, Ri Bhoi District.
Na ka liang kitei ki ophisar, kata ka Kong Linza Fenny Syiem lem bad u Bah V Kharbuki tang mar ïa tip halor ka jingjia, kila wan hiar mar-mar sha Nongpoh naduh hynnin hi ka miet ban ïakren bad ki pulit, ki doctor bad ruh ki bahaïing hasem jong kitei kiba la mad ïa katei ka jingjia ba sngewsih.
Ha kawei pat ka bynta, na ka liang ka ophis jong u District Sports Officer ka Ri Bhoi District lyngba ka kyrwoh ba la soi da u Bah Bobby L Nongbet, DSO ka Ri Bhoi, kala pynpaw ïa ka jingsngewsih jur halor katei ka jingjia tyngkhuh kali kaba la shim noh syndet ïa ka jingim u Sanbirth M Momin, nongñiah kali ka ophis DSO North Garo Hills lem bad u paralok u jong u, u Smart K Sangma.
Na ka liang ka ophis kala pynpaw ïa ka jingpait dohnud halor ka jingduh noh ïa u Sanbirth M Momin bad yn ïai kynmaw junom halor u synñiang bad ka jingtrei shitom ka jong u ban pyndep hok ïa la ka kamram.
Da ka mynsiem jong ka jingsngewkhia, ka ophis ka ai ruh ïa ka kyrwoh sngewlem ryngkat ki jingduwai sha ki bahaïing hasem bad kiba ieid ba thoiñ kiba mad ïa kane ka jingjia ba sngewsih.
