Shillong, Risaw 06
U Deputy Commissioner ka West Garo Hills, u Vibhor Aggarwal u la pynbna ba ka kam haba ïadei bad ka jingpyllait ïa ka tulop kaba sahteng – kaba 12 bnai na ki 43 bnai sha ki nongtrei ka GHADC yn sa pyndep noh hashuwa ka 15 tarik u Risaw.
U Aggarwal u la pynïaid ïa ka jingïalang kaba la long ha ka Lah Sngi U Blei hapdeng ka Sub-Committee, ki nongtrei ka Garo Hills Autonomous District Council (GHADC), bad ki dkhot jong ka Non-Gazetted Employees Association (NGEA).
Ka jingïalang ka la ïakren halor ka jingthmu bad ka jingïaid shakhmat na ka bynta ban sam ïa ka tulop kaba sahteng – kaba 12 bnai sha ki nongtrei ka GHADC, kumba la mynjur da ka Kynhun Myntri ka Jylla.
Ha kane ka jingïa-lang, ka Sub-Committee ka la wanrah ïa ka saiñdur kaba bniah ne ka ‘Comprehensive Salary Disbursement Plan’, ha kaba la kdew ïa ki sienjam ba la shim ban pyntikna ba ïa ka rukom pyllait tulop yn pyndep hapoh ka 15 tarik u Risaw.
Ki ophisar ka Council ki la pyntip ba ki jingpynkhreh ki la ïaid shakhmat ban lum ïa ka jingkheiñ tulop bad ki kot ki sla kiba donkam ban pynsuk ïa ka jingpyllait pisa.
Haba kren halor kane ka bynta, u Deputy Commissioner, u la pynpaw ba ka jingthmu jong kane ka jingïalang ka long ban khmih bniah ïa ka jinglong ba la khreh jong ka Council bad ban pyntikna ba ka rukom pyllait pisa kan long kaba ïaid beit ïaid ryntih.
U la ban jur ba ka jingpyllait ïa ka tulop kaba 12 bnai ha ka por kaba biang ka long ka kam kaba kongsan tam bad ba ka jingtreikam kan ïaid shakhmat ynda la dep pynbiang lut ïa baroh ki kot ki sla kiba donkam.
La pynkut ïa ka jingïalang da ka jingïasngewthuh jingmut ba baroh ki nongïashim bynta kin ïatreilang ban pyntikna ba ka jingsam tulop kan long kaba lah ban pyndep hapoh ka por ba la buh, ka ban ai jingmyntoi pat ïa baroh ki nongtrei ka GHADC.
Ha kawei ka liang, u President ka NGEA, u Britein Sangma u la pyntip sha ki lad pathai khubor ba watla ka seng kam sngewhun pura ban ïoh tang ïa ka tulop kaba 12 bnai, hynrei ki la mynjur ban pdiang ïa ka. Ha kajuh ka por, u la pynshai ba ki nongtrei kim shym la mynjur ne ai jingmynjur ha kaba ïadei bad ka tulop ba man ka por, kaba thmu ban ai sha ki naduh ka 1 tarik u Naiwieng da ka Sorkar Jylla, naba ym shym la pyntip shai sha ki halor ka tyllong jong ka pisa ne ïoh kano-kano ka jingthoh ka ban pyntikna.
U la ong shuh-shuh ba ka NGEA kan bud ïa ka rai ba la rai lang da ki paidbah ka Ri-lum Garo ha kaba ïadei bad ka jingpdiang ïa ka tulop kaba man ka por, namarba mynta ka la kylla long ka jingsngewkhia jong ki paidbah.
U Sangma u la kdew ruh ba katkum ka jingïakren bad ka Sub-Committee, ïa ka tulop kaba 12 bnai la khmih lynti ban pyllait ha kawei ka sien siew. Hynrei u la maham ba lada ym lah ban siew ha ka shisien siew, ka seng kan sdang biang ïa ka jingïakhih jong ka.
