Shillong, Risaw 06
U Myntri ba khmih ïa ka tnad ka koit ka khiah ka Sorkar Jylla, u Bah Wailadmiki Shylla ha ka 06 tarik u Risaw 2025, u la pynshai ba ka jingai ïa ka bhah pule MBBS na ka bhah ka Jylla, ka dei kaba la leh kat kum ka Standard Operating Procedure (SOP).
Haba jubab ïa ka jingkynnoh ba leh bym hok halor kane ka kam, u Bah Wailad haba ïakren bad ki nongthoh khubor u la ong watla ki don katto katne ki jingsngewkhia ba la pynsngew da ki sengbhalang kynthup ka KSU bad JSU, hynrei kaba bun hi na kane ka kam ka dei kaba la lah ban pynbeit.
U Myntri u la batai ruh ba ki samla pule ba ïoh bun marks eh (top score) na ka thup jong ki Khasi-Jaiñtia ki la jied ban ïai neh hapoh ka bhah ba la buh kyrpang (reserve category), watla ki lah ban jied ïa ka bhah ba khlem buh kyrpang (unreserved) hynrei hadien ba pynsngew ïa ki jingsngewkhia, kine ki samla pule ki la pynpaw ïa ka jingkloi ban shim noh ïa ka bhah kaba khlem buh kyrpang.
Hadien ka jingïalang bad ka KSU ka Sorkar ka la shim ïa ka rai ba yn pyntreikam ïa ka jingkyrpad jong ki samla pule. “Ka samla pule kaba dei ka topper na ka reserved category na ki Khasi-Jaiñtia, ka dei ha ka jingshisha ban leit noh sha ka thup ‘unreserved category’ namar ka marks jong ka, ka kham heh ban ïa kiwei ki kyrtong. Hynrei ha ka SOP, ka kren shai ba ka shong ha ka kyrtong ban jied. Namar ba ka lah ban jied ïa baroh artylli-unreserved bad reserved category, ka shong ha ka ban jied. Haba nyngkong, ka la pynpaw ba kan jied beit ïa ka bhah ki Khasi-Jaiñtia, na kata ka daw ngi la pyllait ïa ka thup. Hadien haba ki sengbhalang ki la pynpaw ïa ka jingsngewkhia, ka ruh ka la phone bad ka la pynpaw ba ka kloi ban leit noh sha ka unreserved category” u la ong.
“Namar kata, mynta ka sngi ngi la khot ïa ka jingïalang bad baroh ki don ïa ka jingsngew, naba kane ka samla ka la mynjur, kumta na ka tnad ruh kam don jingeh shuh. Nga tharai ba mynta la dep pynbeit lut ïa kiei-kiei baroh” ong u Bah Wailad. Haba ïadei pat bad ka jingseng ïa ki medical college ba thymmai, u Myntri u la pynpaw ïa ka jingkwah jong ka Sorkar ban seng ïa ka medical college ha Jowai, Nongstoiñ bad kiwei pat ki bynta jong ka Jylla. Hynrei, u la ban jur ruh ba ka jinglah ban pyntrei kam bad ka jingbiang ka pla tyngka kan long kaba kongsan ha ka ban pynthikna la kine ki project ki long ne em ban pyntrei.
Halor ka jinglong jingman ki artylli ki medical college, u Bah Wailad u la ong ba ka jingïasyllok ka dang ïaid ban pynrung klas ïa ki samla pule ha Shillong Medical College, katba ka jingtei ïa ka Tura Medical College ka dang sahteng ban pyndep.
