Jowai, Risaw 06
Ka Tyrshang SC ka la khur jingjop, katba ka Maïa SC bad ka Lumsharatoh ki la ïasam mar shi point ha ka lympung ïalehkai 1st Division Football Tournament ba la pynïaid da ka Thadlaskeiñ Sports Association (TSA) ha ka lah sngi U Blei.
Ha kane ka jingïalehkai kaba la long ha Multi Sports Complex kaba ha Wahïajer, ka Tyrshang SC ka la pynliem noh ïa ka Dongmihsngi da 3-0 kol.
Kumba ka paw ki rangïalehkai ka Tyrshang ki la pyrshang ban ïalehkai bha naduh kaba sdang ha kaba u Sankijuh Challam u la ïoh ban thep ar kol ha ka minit kaba 2 & 57 bad ïa kawei pat la thep da u Pyrkhat Tyngkra (77).
Haba phai sha kawei pat ka jingïakhun hapdeng ka Maïa SC bad ka Lumsharatoh ki la ïakhaid mar 1-1 kol.
Ha kane ka jingïakhun ka Maïa ka la pynkhih jar nyngkong lyngba u Sukmi Lamin ha ka minit kaba 16, hynrei ka Lumsharatoh ka la pynphai kylla lyngba u Mark Andriew Thubru ha ka minit kaba 24.
Ka jingïakhun phainal jong ka Super Division kan long ha ka sngi Balang hapdeng ka Mukhla Raij pyrshah ïa ka Lumphyrnai Sohphoh ha ka por 1 baje mynsngi.
