Gaza Strip, Risaw:
Ka Hamas, ha ka Sngi U Blei, ka la kyntu ban pyniaid noh kloi ïa ka jingïapyllait briew markylliang ban ïa pyllait noh ïa ki koidi jong ka Gaza bad ki nongshah rahbor jong ka Israel, katba ki nongïakren na baroh arliang ki dang leit sha Egypt ban pyniaid ïa ka jingïakren ba kongsan kiba thmu ban pynkut noh ïa ka thma kaba la neh mynta la jan ar snem hapoh ka nongbah Gaza.
Kane ka jingpynbor jong ki nongïalam ka long hadien ka jingkynthoh ba bha jong ka Hamas ïa ka lynti jong u Donald Trump ban pynkut noh ïa ka jingïaleh bad ban pyllait ïa ki nongshah set ha Gaza kum ka jingsiew kylliang ïa ki nong Palestine kiba la shah set ha ki phatok jong ka Israel, ha kaba u nongïalam jong ka US u la kyntu ïa baroh arliang mamla ban “ïaid stet”.
“Ki la don ki jingïakren kiba bha bha bad ka Hamas, bad ki Ri na kylleng ka Pyrthei (Arab, Muslim, bad baroh) ha kane ka taïew ba kut, ban pyllait ïa ki Hostage, ban pynkut noh ïa ka Thma ha Gaza hynrei, kaba kham kongsan, ha kaba khatduh ki la wad slem bha ïa ka JINGSUK ha Middle East,” ong u Trump ha ka Sngi U Blei ha ka rynsan Truth Social jong u.
“La ïathuh ïa nga ba ka bynta kaba nyngkong ka dei ban pyndep mynta ka taïew, bad nga kyrpad ïa baroh ban IAID STET.”
Ki myntri kam bar ri na ki katto katne ki ri, kynthup ïa ka Egypt, ki la ong ba ka jingïakren ha ka nongbah Sharm El-Sheikh jong ka Egypt, ka dei ka “lad kaba shisha” ban ioh ïa ka jingsangeh thma kaba neh, katba u Myntri Rangbah duh jong ka Israel, u Benjamin Netanyahu, u pynpaw ïa ka jingkyrmen, ba ïa ki nongshah rahbor, yn lah ban pyllait noh tang hapoh katto katne sngi.
Uwei u heh jong ka Hamas u la ong ha ki nongthoh khubor khlem da kwah ban pynpaw kyrteng ba ka kynhun Palestine “ka kwah bha ban poi sha ka jingïateh kular ban pynkut noh ïa ka thma bad sdang mardor ïa ka jingpynkylla koidi katkum ka jinglong jingman ha madan”.
U Secretary kam bar ri jong ka US, u Marco Rubio, ha ka sngi U Blei, u la kyntu ïa ka Israel, ba kan sangeh noh ïa ka jingbthei bom ïa ka Gaza, ha shwa ka jingiakren ha Egypt.
“Phim lah ban pyllait ïa ki nongshah rahbor hapdeng ki jingïakhih, kumta ki jingïakhih kin hap ban sangeh noh”, la ong u Rubio ha ka CBS.
“Kam lah ban don ka thma kaba iaid hapdeng jong ka.”
