Ka jingkiew jong ki jingjia aksiden kali ha ki surok Four-lane jong ka Ri-Bhoi District, khamtam ha shilynter ka surok bah National Highway 6, ka la paw kum ka jingeh kaba khraw ïa ka jingshngaiñ jong ki paidbah. Kane ka surok kaba la kyntiew ban pynïasoh bad ban pynbha ïa ka jingïadei bad kiwei ki thaiñ, hynrei ha kane ka bynta jong ka Four-lane mynta la sakhi ïa ka jingkiew jong ki jingjia aksiden kaba la poi shaduh u pud jong ka jingduh ïa kiba bun tylli ki mynsiem briew.
Ki kaiphod ba dang shen bad ki jingpeit bniah, ka pyni ba ka jingbun jong kine ki jingjia aksiden lah ban pynïadei na ka jingbakla jong ki briew bad ki jingduna ha ki jingtei, kum ka jingbym biang ki jinglad jingshai, ka jingbym biang ki dak jingthoh, ka jingbym biang jong ki jaka ban ïaid kjat bad jam na shiliang sha shiliang jong ki briew bad kiwei-kiwei. Ka jingpynher sted ïa ki kali, ka jingbym shimkhia ïa ki kyndon ñiah kali, ka jingshim pass ha ki bynta ba khongwaiñ bad ka jingñiah kali hapdeng ka jingshoh khawiang ki long ki jingleh kiba shyrkhei bad kiba la sakhi man ka por ha kane ka surok.
Dang ha kine ki sngi, la sakhi ïa ki jingjia aksiden kali kaba la wanrah ïa ka jingduh noh jong ki mynsiem briew kaba la jia ha ki ar tylli ki jaka, kawei ha kaba ka trok ka la leit ban syllad naphang ïa ki khynnah kynthei kiba dang ïaid lynti ha Thadrang ha kaba saw tylli ki mynsiem ki la duh ei bad lai ngut kiba la mynsaw bad ha kawei pat ka jingjia kaba la jia ha ka janmiet ka sngi U Blei ha Umsawnongkharai, ar tylli ki mynsiem briew ki la duh noh bad lai ngut kiwei pat ki la mynsaw jur.
La ïoh ruh ban sakhi ba kum shi bynta ban tem ïa kum kine ki jingjia aksiden kali ha surokbah, na ka liang ki pulit pynïaid kali jong ka Ri-Bhoi dang ha kine ki khyndiat sngi ki la pynlong ïa ka jingtalasi kali bad kumjuh ruh ban pyndonkam da ki tiar ka juk mynta ban lap la kiba ñiah kali ki don hapdeng ka jingshoh khawiang ne em. Ha kane ka jingtalasi, la ïohi ba ki la don bun ngut kiba la pynkheiñ ïa ki kyndon ñiah kali, ha kaba da ki pulit ki la ïoh ban daiñ kuna da ki lak tyngka. Ka long kaba donkam ban pynjur ïa kum kane ka jingtalasi, lada lah lei dei ban pynlong manla ka por.
Kaba sngewkhia khamtam ka long ka jingnang jur jong ki kali heh kiba ïadon bynta ha kine ki jingjia aksiden, khamtam ha ka por miet. Bun ki trok bad ki nongpynïaid ïa ki kali khaïi ki ïaid ha ka jingstet kaba ym lah ban ïada lane ñiah kali khlem da shongthait bha, kaba wanrah pat ïa kum kine ki jingjia. Nalor kata, ka jingbym don ka jingpeit bniah ïa ka leit ka wan man ka por, kaba pynlong ïa ki nongñiah kali khamtam lei ha ka por mynmiet ban ïaid ha la ka jong ka mon bad sngew kumba ki la dei ki trai jong ka surok. Ki trok ki dei ban ïaid beit na ka bynta jong ka diang hynrei kumba ka paw hi, kiba bun ki trok ki ïaid beit napdeng jong ka surok ne marjan bad u ‘divider’ bad pynlong ïa kiwei ki kali rit ban mad jingeh, lada ki kwah ban tam shakhmat.
Ban weng ïa kane ka jingeh, dei ban pyntreikam kyrkieh ïa ka buit treikam kaba bun rukom, kaba ïadei bad ka jingdonkam ban pyntreikam ïa ka jingpahara man ka por, ka jingpeit bniah ïa ka jingïaid pynher stet, bad ka jingpynshitom da kaba tyngeh ïa ki nongpynkheiñ ïa ki kyndon aiñ ñiah kali.
Donkam ban ai ki jingpynsngewthuh bad jinghikai ïa ki nongshong shnong, ha ki skul, ki nongñiah kali kamai, bad ki seng kit mar ki dei ban ïashim bynta ha ka jinghikai kaba bteng shaphang ka jingshngaiñ ha surok, ka jingïarap nyngkong, bad ka jinglong ba don jingkitkhlieh ha kaba ñiah kali. Ka por ka long ban leh eiei noh mynta. Ai ba kane kan long ka jingkylla na ka bynta ka Ri-Bhoi District ba kan long ka nuksa na ka bynta ka jingshngaiñ ha surok ha ka Jylla Meghalaya bad shabar.
