Jowai, Risaw 06
Ka Khliehmyntang Ïalong ka la rung sha ka final ha ka lympung ïalehkai 2nd Division Football Tournament na ka bynta ka 8th Debo Shullai Memorial Trophy ba la pynïaid da ka West Jaiñtia District Sports Association (WJDSA).
Kane ka jinglah ban pynthikna ka la wan urlong hadien ba ka la pynliem noh ïa ka Mulang Ïalong da 1-0 kol ha ka jingïakhun semi final kaba la long ha ka lah sngi U Blei ha Kiang Nangbah Stadium, Jowai.
Watla kane ka jingïakhun kaba la long kaba itynnad bad kaba ïakhaid bha lyngba ka jingïalehkai baroh ar liang mamla, hynrei hashwa ban wai, ka Khliehmyntang ka la ïoh ïa ka kabu kaba biang ban thep shi kol lyngba u Bachan Pale ha ka minit kaba 94 bad ban khur syndon ïa ka jingjop.
