Shillong, Risaw 06
Ka Ibashembha Khongsit ka la thep saw kol na ka bynta ban pynlong ïa ka Mawlum Tyrsad SC ba kan pynliem noh ïa ka Mawsawrit SC da 8-0 kol, ha ka jingïalehkai jong ka Group-B ha ka Meghalaya Women’s State League 2025, ba la pynïaid da ka Meghalaya Football Association (MAA) ha ka sngi Saitjaiñ.
Katba ki resol na ki artylli kiwei pat ki jingïakhun, ka Mawten SC bad ka Pay For Right, ki la lah ban khur ïa ka jingjop kaba long da 2-1 kol hadien ba ki la pynliem ïa ka Young SSCC bad ka Na Rympei FA.
Haba phai biang sha ka jingïakhun ba la long ha Tyrsad, ka Ibashembha ka la ïoh ban thep ha ka minit kaba 4, 59, 75 & 83, bad ïa ki kol kiba sah la thep da ka Irilang Khongsit (6 & 29) bad ka Naisha Nongrum (9 & 10).
Katba ha ka jingïalehkai jong ka Group-A, hapdeng ka Na Rympei FA bad ka Pay For Right FA lah ban ong ba ka long kaba kham ïakhaid bad itynnad bha jong ka MWSL 2025, hadien ba ka Na Rympei kaba wan ban mihkhmat na Ri Bhoi, katba ka PFR kaba la mihkhmat ïa ka Shillong Sports Association.
Ka jingïakhun hi ka long ba haduh ba kut ka kylla step, kine ki ar kynhun kim pat shym la lah ban pynkhih jar satia, pynban katba ka jingïakhun ka la jan sha kaba kut, ka Nisilia Majaw jong ka PFR ka la pynpaw biang ïa ka sap bad ka jingtbit jong ka kum ka nongïalehkai ba kynsai namar hapoh ar minit ka la thep ar kol ha ka minit kaba 75 bad kaba 77, katba ka Na Rympei ka la ïoh ban thep shi kol ha ka minit kaba 90+3 lyngba ka Cynthia Mylliem Umlong, te kumta kane kan dei ka nam jop kaba ar ïa ka PFR ha kane ka lympung ïakhun.
Ha kawei pat ka jingïakhun jong ka Group-B, ki ‘thei ïalehkai jong ka Mawten ki la lah ban tam shakhmat da ar kol ba la thep da ka Larihun Sohthiang (58) bad ka Bankyntiew Ryntathiang (67), bad ïa ka shi kol na ka Young SSCC la thep da ka Titful Sohbar (83) hashwa ba kan mad ïa ka jingshah rem.
