Shillong, Risaw 06
U MLA ka United Democratic Party (UDP) na Khliehriat u Bah Kyrmen Shylla uba la shah pynhiar na ka shuki kum u Myntri Sorkar dang shen, u la ong ba ka UDP kam donkam ban don ka jingïateh kular ban ïakylliang Shuki mar shiteng hapdeng ki para MLA.
Haba kren sha ki nongthoh khubor u Bah Kyrmen ula ong ba ka jingkylliang shuki Myntri Sorkar hapdeng ki MLA ka UDP ka dei tang ka jingïasngewthuh jingmut hapdeng ki MLA, ïa ka rai ban kylliang shuki Myntri Sorkar la shim ha ka jingïalang ba la lum da u President ka UDP hadien ka jingïathir hapdeng ki MLA.
U la ong, ka UDP ka don ka don hok ban kylliang Myntri napdeng ki 12 ngut ki MLA ba ka don ha ka Sorkar MDA-2.0, “ka jingkylliang Myntri ka UDP ka dei ka rai ba la pdiang lang, ka UDP ka dei ka seng kaba ïatylli bad kaba don ka jingïasngewthuh jingmut hapdeng ki para dkhot bad ki pdiang ïa ka rai khlem kano-kano ka jingbuh kyndon.”
U Bah Kyrmen u la pynpaw ka jingsngewnguh ïa ki paidbah ka Jylla Meghalaya kiba la shaniah ha u ïa ka kam ban long kum u Myntri Sorkar haduh hynriew snem shiteng. Kumjuh ruh u la ong ba u la pyrshang katba lah ban ai ka jingshakri kaba bha tam ïa ki paidbah ha ka por ba u dang long kum u Myntri Sorkar bad mynta u khmih lynti ban un ïoh ban pynlut por khambun bad ki paidbah ka Constituency ba la jied ïa u kum u MLA.
U Bah Kyrmen u shim ïa ka jingshah pynhiar shuki Myntri Sorkar kum ka jingkyrkhu namar mynta u kham ïoh por shibun ban trei na ka bynta ka bha ka miat ki paidbah bad ka Konstitwensi ba u mihkhmat.
“Hooid ka long ka burom ban ïoh long Myntri Sorkar namar nga ïoh ka lad ban shakri, ym tang ïa ka Constituency ba nga mihkhmat hynrei ïa ka Jylla baroh kawei, hynrei mynta ba nga long u MLA ngan ïoh por kham bun ban trei kham bha na ka bynta ka jingmyntoi ki paidbah bad ka constituency ba nga mihkhmat” la ong u Bah Kyrmen. U Bah Kyrmen u la ong ba, ïa mynta um don shuh kano-kano ka kam ha ka Sorkar, hynrei un ïai-bteng ban trei bad ban shakri na ka bynta ka party.
