Shillong, Risaw 06
Sa shisien pat ki ar ngut ki ‘thei ïalehkai Under-17 ka Jylla ki la paw biang hapoh ka thup ki 23 ngut ki ban mihkhmat ïa ka kynhun ïalehkai ka ri India na ka bynta ka AFC U-17 Women’s Asian Cup China 2026 Qualifiers, kaba la buh ban long ha ka 13 bad 17 tarik mynta u bnai ha Bishkek, Kyrgyzstan.
Kine ki long ka Bonifilia Shullai ka ban ïalehkai ha ka bynta kaba shapdeng bad ka Alisha Lyngdoh ha ka bynta kaba shadien.
Ïa kane la pynbna da u coach ka kynhun u Joakim Alexandersson ha ka lah sngi U Blei. Ha ka Group-G kaba don lai tylli ki kynhun, ka India kan pynkhreh ban ïakhun pyrshah ïa ka Kyrgyz Republic ha ka 13 tarik bad ïa ka Uzbekistan ha ka 17 tarik. Ïa baroh ar kine ki jingïalehkai yn pynlong ha Dolen Omurzakov Stadium bad kin ïalehkai ha ka por 6:30 janmiet. Ki kynhun ki ban khur jingjop kin ïoh rung sha ka wat kaba khatduh ka ban kynthup ïa 12 tylli ki kynhun bad ïa kane ka jingïalehkai ka wat kaba khatduh yn pynlong ha China ha u snem ban wan. Hadien ba ki la jop ïa ka SAFF U-17 Women’s Championship kaba la long ha u Nailar ha Bhutan, katei ka kynhun ïalehkai ka ri ka la bteng ïa ka jingïalehkai kilanmet ha Bengaluru shwa ba kin kynriah sha Goa. Te kumta kane ka kynhun kan poi ha ka sngi Ba-ar ha Bishkek, khnang ba kin ïoh ban pynïahap bad ka jinglong ka mariang ha katei ka jaka namar ka nongbah Kyrgyz ka long kaba khriat, te kumta ki dangïoh por hynriew sngi kin ïoh ban pynkhreh na ka bynta katei ka jingïalehkai kaba nyngkong.
Ki kyrteng ki 23 ngut ki ‘thei ïalehkai ka ri India
Goalkeeper: Munni, Surajmuni Kumari & Thameena Fathima.
Defender: Alena Devi Sarang-them, Alisha Lyngdoh, Binita Horo, Divyani Linda, Elizabed Lakra, Joyshini Chanu Huidrom, Ritu Badaik & Taniya Devi Tonambam.
Midfielder: Abhista Basnett, Anita Dungdung, Bonifilia Shullai, Julan Nongmaithem, Pritika Barman, Shveta Rani & Thandamoni Baskey.
Forward: Anushka Kumari, Anwita Raghuraman, Nira Chanu Longjam, Pearl Fernandes & Valaina Fernandes.
